Аҟәа. Ԥхынҷкәынмза 18, 2023 шықәса. Аԥсныпресс. «Жәларбжьаратәи агәыҳалалратә џьармыкьа - 2023» ԥхынҷкәынмза 16 рзы Дамаск ақалақь, асасааирҭа Dama Rose, аизарақәа руада Аль-Мутанабби аҿы имҩаԥысит, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.
Аусмҩаԥгатә аиҿкааҩыс иҟоуп Шьамтәылатәи адипломатиатә клуб. Уи аилазаараҿы иҟоуп адипломатиатә миссиақәа рхадацәа рыԥшәмацәа, адипломатцәа, Шьамтәыла аккредитациа змоу ҳаҭыр зқәу аконсулқәа. Аусмҩаԥгатә ахықәкы хада –2023 шықәса, жәабранмзазы Шьамтәыла иҟалаз адгьылҵысра ӷәӷәа аҿы ааха зауз ацхыраара рыҭаразы аԥара аизгара.
Аусмҩаԥгатә рхы аладырхәит Шьамтәылатәи Арабтәи Ареспублика аҿы аккредитациа змоу 16 тәыла рҟынтәи адипломатиатә миссиақәа, иара убас шьамтәылатәи агәыҳалалратә еиҿкаарақәа жәпакы рхаҭарнакцәа.
Шьамтәылатәи Арабтәи Ареспубликаҿы иҟоу Аԥсны ацҳаражәҳәаҩ Мухаммад Али иԥшәмаԥҳәыс Сиузанна Абаза (Гагәылиа) иареи Аԥсны апавилион иаҭааз Адипломатиатә клуб ҳаҭыр зқәу апрезидент иԥшәмаԥҳәыс Шьуқриа Аль-Микдад зхадараҿы дыҟаз асасцәа, Шьамтәыла адәныҟати аусқәа рминистр, Адипломатиатә клуб ахада иԥшәмаԥҳәыс Аииа бин Шьаабан, Шьамтәылатәи Арабтә Республика аҿы иҟоу Ливииа ацҳаражәҳәаҩ иԥшәмаԥҳәыс, уҳәа егьырҭ ҳаҭыр зқу асасцәа ирԥылеит.
