Аҟәа. Ԥхынҷкәынмза 18, 2023 шықәса. Аԥсныпресс. Аԥсны Жәлар Реизара аиҳабы Лаша Ашәба зхадараҿы дыҟоу адепутатцәа рделегациа Урыстәылеи Белоруссиеи Реидгыла Апарламенттә Еизара 65 -тәи асессиа аусура аҽаланархәит. Апарламенттә Еизара изаамҭанытәиу асессиа иахьа, Москва ақалақь аҿы имҩаԥысуеит.
Аделегациа аилазаараҿы иҟоуп Апарламент Аиҳабы ихаҭыԥуаҩ Фазлыбеи Аҩӡба, аграртә политика, аԥсабаратә ресурсқәеи аекологиеи рзы апарламенттә Еилакы ахантәаҩы Ҭемыр Беиа, атәылахьчареи амилаҭтә шәарҭадареи рзы апарламенттә Еилакы ахантәаҩы ихаҭыԥуаҩ Беслан Емырхәба, аекономикатә политика, ареформақәа, аинформациатә технологиақәа рзы апарламенттә Еилакы алахәыла Герман Каҷараа, Аԥсны Жәлар Реизара-Апарламент Аппарат анапхгаҩы Вадим Бжьаниа.
Аилатәара Апарламенттә Еизара Аӡбамҭа ала ишьақәырӷәӷәаз амшхәаԥштә инақәыршәаны имҩаԥысит. Асессиа мҩаԥигеит Белоруссиеи Урыстәылеи Реидгыла Апарламенттә Еизара Ахантәаҩы, Урыстәылатәи Афедерациа Афедералтә Еизара Ахантәаҩы Виачеслав Володин.
Аԥснытәи Апарламент 2008 шықәса раахыс Урыстәылеи Белоруссиеи Реидгыла Апарламенттә Еизара аҟны еснагьтәи анаԥшыҩ истатус ала иалахәуп.
Апарламенттә Еизара Арегламент инақәыршәаны, еснагьтәи анаԥшыҩцәа алшара рымоуп Апарламенттә Еизареи уи акомиссиақәеи реилатәарақәа аилацәажәаратә бжьы рыманы рыҽрылархәра.
