Аҟәа. Ԥхынҷкәынмза 15, 2023 шықәса. Апсныпресс. Урыстәыла Анаукақәа Ракадемиа апрезидент Геннади Красников Аԥсны Анаукақәа Ракадемиа апрезидент Зураб Џьапуа диԥылеит, ҳәа адырра ҟанаҵоит Урыстәыла Анаукақәа Ракадемиа асаит.
Аҩтәылак ракадемиақәа рхадацәа Урыстәылеи Аԥсни рнаукатә еилазаарақәа рыбжьара аԥхьаҟатәи аусеицура аперспективақәа ирыдҳәалоу азҵаарақәа жәпакы ирылацәажәеит, иара убас иҟоу аусеицуразы аиқәшаҳаҭра актуализациеи аҵакытә харҭәаареи рзы еиқәшаҳаҭхеит.
Аиԥылара иара убас рхы аладырхәит Урыстәыла Анаукақәа Ракадемиа апрезидент ихаҭыԥуаҩ, академик Владислав Панченко, Урыстәыла Анаукақәа Ракадемиа жәларбжьаратәи аусеицура Аусбарҭа аиҳабы Михаил Сериогин.
Урыстәыла Анаукақәа Ракадемиа азы ииубилеитәны иҟалараны иҟоу 2024 шықәса жәларбжьаратәи аусеицура азы алшара дуқәа аанартуеит. Ашықәс зегьы иалагӡаны Урыстәыла Анаукақәа Ракадемиа 300-шықәса ахыҵра инамаданы арккаратә, акультуратә, анаукатә усмҩаԥгатәқәа мҩаԥыслоит – урҭ ртәы ԥхынҷкәынмза 12 рзы имҩаԥысыз Урыстәыла Анаукақәа Ракадемиа алахылацәа Рзеиԥш Еизара аҿы еиҭеиҳәеит Геннади Красников.
Зураб Џьапуа Урыстәыла Анаукақәа Ракадемиа аҳәаанырцәтәи алахәыланы дыҟоуп, 2013 шықәса раахыс Аԥсны Анаукақәа Ракадемиа дахагылоуп.
