Аҟәа. Ԥхынҷкәынмза 15, 2023 шықәса. Аԥсныпресс. Изакәанымкәа зыкапан рацәоу арҩышьыгатә маҭәашьар адкылареи аҵәахреи рхы дыгәҩарахеит Очамчыра араион Кәтол ақыҭан инхо, 1992 шықәсазы ииз Кентаба Адгәыр Ҭамаз-иԥа, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.
Азинхьчаратә усбарҭақәа русзуҩцәа азинеилагаҩы Аҳәынҭинспекциа аԥыԥшырҭа «Маҷара» аҿы дааныркылеит. Автомашьына «Тойота» агәаҭараан ирбеит анаркотикатә маҭәашьар «марихуана» згәылаз аилаҳәара.
Аоперативтә усмҩаԥгатәқәа мҩаԥыргеит аҩныҵҟатәи аусқәа Рминистрра Ашьаусԥшааратә Усбарҭа аусзуҩцәеи Гәылрыԥшь араион аҩныҵҟатәи аусқәа Рыҟәша ашьаусԥшааратә усбарҭа аусзуҩцәеи.
Адгәыр Кентаба иганахьала ихацыркыз аусеилыргара мҩаԥнагоит Гәылрыԥшь араион аҩныҵҟатәи аусқәа Рыҟәша аусеилыргаратә гәыԥ.
