Апремиа ранашьахоит аминистрцәа Реилазаара аструктура иалоу аминистррақәеи ахылаԥшырҭақәеи русзуҩ ҿарацәа. Апремиа аҳәаақәа ирҭагӡаны аҳамҭа иара убас иранашьахоит аспортсменцәагьы. Аҿари аспорти русқәа рзы аҳәынҭқарратә Еилакы иҷыдоу аноминациа – аспорт азгәыбылҩцәа рыбжьыҭирала ашықәс иреиӷьу аспортсмен далыркаауеит.

Аноминантцәа рсиа 2023 шықәсазы аспорттә сезон аан доусы реихьӡарақәа рыла ишьақәыргылахон.  Убасала уи иалалеит:  Елҟан Гәазаа (атлетика хьанҭа), Инал Гаделиа (аӡиудо), Ерик Кәарҷиа (астолтә ԥкьаҭмпыл), Даниил Харчлаа (зхы иақәиҭу аиқәԥара), Асҭамыр Асланӡиа (амҵәышәмпыл), Лиудмила Бганба (анапылампыл), Амина Аншба (аԥкьатмпыл), Харитон Агрба (абокс), Џьубеи Аҩӡба (аҽытә спорт), Леон Сабуа (ашьапылампыл), Дмитри Гәазаа (автомобилтә спорт).

Абжьыҭира мҩаԥыслоит ԥхынҷкәынмза 24,  асааҭ 23:59 рҟынӡа. Аиааира згаз ҳәа далкаахоит зфотосахьа аҵаҟа еиҳа алаикқәа зауз.