«Аслан Гьаргь-иԥа иҟаҳҵаз аҳәара иаразнак дахаҵгылеит. Иара иахәҭоу анапынҵақәа ҟаиҵеит, убас, иҷыдоу аҭагылазаашьақәа рзы Аминистрра ацхыраарала Лаҭантәи Гәдоуҭаҟа аӷацәа иԥыржәаз авертолиот аԥҽыхақәа раагаразы ҩ-реиск мҩаԥган. Аҳәынҭқарра Ахада иқәиргылаз ахыдҵа анагӡара иалахәын Аҳәынҭқарра Ахада Ихаҭыԥуаҩ Бадра Гәынбеи иҷыдоу аҭагылазаашьақәа рминистр Лев Кәыҵниеи. Сара идуӡӡаны иҭабуп ҳәа иасҳәарц сҭахуп Аҳәынҭқарра Ахада Аслан Бжьаниа иҳаиҭаз адгылара азы»,- ҳәа инаҵшьны иазгалҭеит Гәыгәыца Џьыкырба.
Гәыгәыца Џьыкырба лажәақәа рыла, иаагаз аверталиот аԥҽыхақәа амузеи аҿы експонатс ицәырыргоит, авертолиот иҭаблыз рфотосахьақәа рыҵаҟа ишьақәыргылахоит, Наунагӡатә амца аркхоит.
Гәыгәыца Џьыкырба иара убас, Аҳәынҭқарра Ахада есымша Аҳәынҭқарратә музеи адгылара аиҭоит ҳәа иазгәалҭеит.
