Аҟәа. Ԥхынҷкәынмза 12, 2023 шықәса. Аԥсныпресс. Аҵарадырра Аминистрра 100-шықәса ахыҵра иазку аныҳәатә усмҩаԥгатә мҩаԥысит Аԥснытәи аҳәынҭқарратә драматә театр аҿы.
Аҵара аминистр Инал Габлиа иқәгылараҿы иахьа Ареспублика Аԥсны азы акыр зҵазкуа мшуп ҳәа иазгәеиҭеит.
«Иахьа ҳара иазгәаҳҭоит Аԥсны аҵарадырра Аминистрра 100-шықәса ахыҵра. Ари имаҷым аамҭахәҭа зҵазкуа аҭоурых азы Аминистрра шьаҿа-шьаҿала, лҵшәа бзала, атәыла аҿы аҵарадыра аҿиареи аларҵәареи рзы ахыдҵа анагӡара иаҿын. 100-шықәса рыҩныҵҟа, акыр ауадаҩрақәа шыҟазгьы, уи атәыла ауааԥсыра зегьы рҵарадырра азы хра злоу алагала ҟанаҵон. Уи дарбанызаалак ауаҩы ипотенциал аарԥшра, ауаажәларра рыҩныҵҟа ихатә ҭыԥ аԥшаареи ижәлар рхаҭарнак иашаны дҟаларц азы иара аҭакԥхықәра адагьы амиссиа ауп инанагӡоз», – ҳәа иҳәеит аминистр.
Иара иазгәеиҭеит, аҵыхәтәантәи 100 шықәса рыҩныҵҟа адунеи акыр аҽшаԥсахыз, аҵара Аминистррагьы аамҭа ишьақәнагылоз аҭагылазаашьақәа аҽарнааланы аус шауаз. Шықәсы рацәа инеиԥынкыланы иҿыцу аҵарадырратә программақәа аус рыдулахон, иԥхьагылоу атехнологиақәа аларгалон, арҵаҩратә методика аиӷьтәра иазку ауснагӡатәқәа мҩаԥысуан.
«Ҳара ари аус дуӡӡа знапы алаку зегьы иҭабуп ҳәа раҳҳәарц ҳҭахуп, аԥхьаӡа иргыланы ҳарҵаҩцәа, еиҵагыло аҿар реиҵааӡараҿы аихьӡарақәа раарԥшраҿы адгылара ҳазҭоз зегьы. Агәра ганы ҳаҟоуп ҳминистрра аринахысгьы аҿиара амҩа ишаныло, аҵарадырра акәзар, Аԥсны аҿиареи апрогресси уасхырс ишамазаауа», – ҳәа иҳәеит аҵара аминистр.
Аҳәынҭқарра Ахада Ихаҭыԥуаҩ Бадра Гәынба Аҳәынҭқарра Ахада Аслан Бжьаниа ихьӡала адныҳәалара даԥхьеит.
«Асовет мчра анышьақәгыла ашьҭахь раԥхьатәи ашықәсқәа рзы иаԥҵан Аԥсны Жәлар аҵарадырратә комиссариат. Уи напхгаҩыс даман ашәҟәыҩҩы, ауаажәларратә усзуҩ Самсон Ҷанба. Аԥсны Жәлар Ркомиссариат аҟны аџьабаа ду рбеит Дырмит Гәлиа, Симон Басариа, Кондрат Ӡиӡариа уҳәа аӡәырҩы. Дара ирыбзоураны Аԥсны иҭыжьын раԥхьатәи арҵагашәҟәқәа, уи ареспублика аҿы аҵарадырра аҿиара акыр иацхрааит», – ҳәа иазгәаҭоуп адныҳәалара атекст аҿы.
Аҳәынҭқарра Ахада иҳаҩсыз ашәшықәса азы Аминистрра аҵарадырра асистема аҿиара, атәылауаа рдыррақәеи рылшарақәеи рыҩаӡара ашьҭыхра аҿы ихадоу ароль нанагӡон ҳәа иазгәеиҭеит.
«Шәара шәаԥхьа иҟаз реиԥш, ааԥсарак ҟамҵакәа ажәлар зыҩаӡара ҳараку адыррақәа рызнагареи апрограммақәеи аҵаратә усбарҭақәеи рмодернизациеи рзы аус жәуеит, арҵаҩратә еилазаара ацхыраареи адгылареи ашәҭоит», – ҳәа иазгәаҭоуп адныҳәаларатә цҳамҭа атекст аҿы.
Аслан Бжьаниа арҵаҩцәа зегьы агәабзиареи ачҳареи аманшәалареи рзеиӷьеишьеит.
Аԥсны атәылахьчара аминистр Владимир Ануа ихьӡала аҵара Аминистрра 100-шықәса ахыҵра инамаданы адныҳәалара даԥхьеит атәылахьчара аминистр ихаҭыԥуаҩ Давид Бжьаниа.
Атәылахьчара аминистр Идҵа ала «Аԥсны жәлар Рџьынџьтәылатәи еибашьра аҿы Аиааира 30-шықәса ахыҵра» азы амедал ианашьахеит аҵарадырра Аминистрра абаҩарҵәыреи аспорти аррақәраанӡатәи азыҟаҵареи рыҟәша аиҳабы Аслан Ҭаркьыл.
Адныҳәаларақәа рышьҭахь арҵаҩцәа «Аԥсны Зҽаԥсазтәыз арҵаҩы» ҳәа ахьӡқәа ранаршьеит.
Иара убас аҳаҭыртә шәҟәқәа ранашьахеит аҵарадырра Аминистрра аусзуҩцәа.
Аныҳәатә усмҩаԥгатә аконцерт ала ихыркәшахеит.
