Аҳәынҭқарратә Дума Ахантәаҩы Виачеслав Володин изырханы Лаша Ашәба иҳәеит: «Ҩажәижәаба шықәса раԥхьа иуадаҩыз аҭоурыхтә период азы ирыдыркылаз Урыстәылатәи Афедерациа Аконституциа ҳаамҭазтәи урыстәылатәи аҳәынҭқарра ашьақәгылараҿы акырӡа зҵазкуа ароль нанагӡеит. Урыстәылатәи Афедерациа Аконституциа  уи азинтә система уасхырс иамоуп, УА аҿаԥхьа иқәгылоу ауснагӡатәқәа рыӡбара шьаҭас иамоуп. Гәахәарала иазгәаҳҭоит астратегиатә усеицура аганахьала аԥсны-урыстәылатәи аизыҟазаашьақәа аԥхьаҟагьы рырӷәӷәара наҟ-ааҟгьы азҿлымҳара шаҳҭо. Ҩ-ганктәи аимадарақәа рҟазшьа ҷыдақәа шьақәырӷәӷәан официалла имҩаԥысыз ҳаиҭанеиааирақәа рыҟны. Урҭ реихшьалақәа рыла иалыршаз аиқәшаҳаҭрақәеи Аԥсны Жәлар Реизара-Апарламенти Урыстәылатәи Афедерациа Афедералтә Еизара Аҳәынҭқарратә Думеи рыбжьара  аусеицуразы  Аиқәшаҳаҭрақәа ҳаизыҟазаашьа аганқәа зегьы рырҭбааразы акрызҵазкуа ак акәны иҟалеит».

Аԥсны Жәлар Реизара-Апарламент Аиҳабы Афедерациа Ахеилак алахәцәа, Аҳәынҭқарратә Дума адепутатцәа, Урыстәыла ажәлар зегьы  ирзеиӷьеишьеит руснагӡатәқәа рыӡбараҟны аихьӡарақәа, аҭынчра, аизҳазыӷьара.     

Аԥсны Жәлар Реизара-Апарламент адепутатцәа рыхьӡала Лаша Ашәба иара убас адныҳәалара ҟаиҵеит Аԥсны Аҳәынҭқарраҟны иҟоу Урыстәылатәи Афедерациа Аҷыдалкаатәи Азинмчы змоуи Ацҳаражәҳәаҩ Михаил Шургалин ихьӡала.  Адныҳәаларатә цҳамҭа аҿы ахәҭакахьала иазгәаҭоуп:   

«30 шықәса раԥхьа ирыдыркылаз Урыстәылатәи Афедерациа Аконституциа ҳаамҭазтәи Урыстәылатәи Аҳәынҭқарра шьаҭас иаиуит. Иахьагьы уи атәылауаҩратә зинқәеи ахақәиҭреи ахьыԥшымреи Урыстәыла акзаареи шьақәзырӷәӷәо ихадоу Азакәанеидкыла ауп. Ари аныҳәа есқьынгьы еиднакылалааит Урыстәыла ажәларқәа, атәыла аԥеиԥш бзиазы ирымоу агәыӷра арӷәӷәалааит» – аҳәоит Аԥсны Жәлар Реизара – Апарламент Аиҳабы иҟаиҵаз адныҳәаларатә цҳамҭаҟны.