Аҟәа. Ԥхынҷкәынмза 11, 2023 шықәса. Аԥсныпресс. Аԥхынра, 2024 шықәсазы Шәачантәи Аԥсныҟа аныҟәара иалагоит ҩ-фымцадәыӷбак «Ласточка». Арҭ ареисқәа адәыӷбақәа рныҟәара аграфик иаларгалеит, уи аусура иалагоит ҳазҭоу ашықәс ԥхынҷкәынмза 10 рзы, ҳәа Нхыҵ-Кавказтәи Аихамҩа апресс-маҵзура ахь азхьарԥш ҟаҵо адырра ҟанаҵоит «Вести Сочи».
2023/2024 шш. рзы аихшанҵа шьақәыргылоуп ари атранспорт хкы зхы иазырхәо ауаа рхыԥхьаӡара аизҳара иадҳәаланы. Убас, акурорттә сезон аан иццаку афымцадәыӷбақәа ныҟәалоит, урҭ рмаршрутқәа Шәача-Гагра, Аҳаирбаӷәаза-Шәача-Гагра ахырхарҭақәа рыла ишьақәгылоуп. Арҭ адәыӷбақәа рреисқәа раԥхьаӡа акәны ишьақәырӷәӷәан аԥхынра 2023 шықәсазы. Урҭ атуристцәа рыбжьара ахархәара бзиа аман.
Иазгәаҭоуп, зынӡа Нхыҵ-Кавказтәи Аихамҩа иҿыцу аихшанҵа аҿы иазԥхьагәаҭоуп 190 наҟ-ааҟтәи ахырхарҭала иныҟәо адәыӷбақа, урҭ рахьынтә быжьба ҩ-еихагылакны иҟоу авагонқәа рыла ишьақәгылоуп.
Убри аан Ареспубликатә Унитартә Наплакы «Аԥснытәи Аихамҩа» аҿы иҟарҵо адыррақәа рыла, 2024 шықәсазы «Ласточка» адәыӷбақәа рмаршрут Аҟәанӡа иацҵахоит.
