Ианаамҭаз аколлетив аншлагқәа аманы Урыстәыла ахи-аҵыхәеи, Нхыҵ-Кавказ иалсит, иаҭааит Болгариеи Ҭырқәтәылеи. Ансамбль «Гәында» арҿиаратә иааирақәа рхыԥхьаӡараҿы иҷыдоу аҭыԥ ааннакылоит Адунеизегьтәи афестиваль «World Folk», араҟа аҭыԥҳацәа ироуит ахьтәы медал, аҳамҭа «Золотой Орфей», асахьаркыратә напхагаҩы лакәзар – Маестро ҳәа ахьӡ аиура лҽаԥсалтәит.

Ансамбль алахәылацәа ахшыҩзышьҭра ду арҭоит ансамбль Аԥсны ақалақьқәеи ақыҭақәеи рҿы имҩаԥнаго аконцертқәа.

Роза Расим-иԥҳа иазгәалҭоит: «Ҳара абжьааԥны иаразнак ҳаужьҭра рҭахӡам, ақыҭауаа ракәзар, урҭ даара ҭабуп ҳәа аҳәара здыруа, апатуқәҵара злоу ахәаԥшцәа роуп. Ашәа ахәра арӷьоит рҳәоит. Саргьы иуадаҩу аҭагылазаашьа ансымоу, сеиқәзырхо сусура ауп, иара убас сыуацәеи исзааигәоу ауааи ансамбль «Гәында» аҟынтәи сыӡӷабцәеи. Сара гәазыҳәарас исымоу? Ажәлар рмузыка, ажәлар ринструментқәа  рыбжьы есымша иқәыҩларц ҳаԥсадгьыл!».