Ашколхәыҷқәа рыдагьы ари аспорттә обиект, ашьапылампыл-маҷ азы адәы рхы иадырхәар рылшоит ақыҭауаагьы апрофессионалтә командақәагьы.
«Ҳқыҭаҿы иҟоуп х-школк. Руак аҿы мацара аҵара рҵоит 123-ҩык аҵаҩцәа. Иахьатәи амш аҟынӡа ахәыҷқәа аспорттә плошьадка рымаӡамызт. Ҳара ари адәы агәаҭарагьы ҳахьӡеит, даарагьы иаҳгәаԥхеит уи», - ҳәа иҳәеит ақыҭа ахада ихаҭыԥуаҩ, аамҭак ала абаҩарҵәыра арҵаҩыс аус зуа Баҭал Ҳашба.
Ашьапылампыл-маҷ адәы аартра ацеремониа ашьҭахь имҩаԥысит ашьапылампылтә турнир, уи рхы аладырхәит ақыҭақәа Баслахә, Маркәыла, Акәасқьа рҟынтәи акомандақәа.
Астадион-маҷ аргылара иақәхарџьхеит 4,9 млн. мааҭ. Афинансқәа азоужьхеит ареспубликатә биуџьет аҟынтәи.
Астадион аартра ацеремониа рхы аладырхәит Очамчыра Ахадара ахаҭарнакцәа, ақыҭа ахада Ҭемыр Гындиа, Жәлар Реизара-Апарламент адепутат Демур Гогиа.
Очамчыра араион егьырҭ ақыҭақәагьы рҿы ҳаԥхьаҟа ашьапылампыл-маҷ астадионқәа рыргылара азԥхьагәаҭоуп.
