Аҟәа. Ԥхынҷкәнмза 7, 2023 шықәса. Аԥсныпресс. Аинтернет маҵзура азы атарифқәа рышьҭыхра иадҳәалоу аҭагылазаашьа иадҳәалан Аимадареи амассатә коммуниациақәеи ацифратә ҿиареи рзы аҳәынҭқарратә Еилакы аҿы имҩаԥысыз аусуратә еилатәара. Уи рхы аладырхәит амобилтә еимадареи аинтернет-аҳамаҵдгалаҩцәеи роператорқәа рхаҭарнакцәа. Абри азы адырра ҟанаҵоит аҳәынҭқарратә Еилакы аофициалтә саит.
Аимадареи амассатә коммуниациақәеи ацифратә ҿиареи рзы аҳәынҭқарратә Еилакы ахантәаҩы Роланд Берулаа амобилтә еимадареи аинтернет-аҳамаҵдгалаҩцәеи роператорқәа рхаҭарнакцәа аҵыхәтәантәи аамҭазы атарифқәа рышьҭыхра инамаданы ауааԥсыра акыр агәынамӡара шаадырԥшуа иҳәеит, иара убас ишьақәгылаз аҭагылазаашьа мзысқәак иамоу атәы еиҭарҳәарц азы аҳәара ҟаиҵеит.
Ахәҭакахьала амобилтә еимадареи аинтернет-аҳамаҵдгалаҩцәеи роператорқәа рхаҭарнакцәа абонентцәа рганахьала иҟоу агәынамӡара шеилыркаауа, аха ахәқәа рышьҭыхра зда ԥсыхәа ыҟам уснагӡоуп ҳәа иазгәарҭеит. Уи зыдҳәалоу аҭагылазаашьақәа рахь иаҵанакуеит:
Авалиутақәа ркурс акыр ашьҭыҵра;
Афымцамчи абылтәи рыхәԥса ашьҭыҵра;
Амаругақәеи аматериалқәеи, иара убас алогистикеи рыхәԥса ашьҭыҵра;
Иааизакны адунеитә економика аҿы ахәқәа акырынтә рышьҭыҵра.
