Аҟәа. Абҵарамза 30, 2023 шықәса. Аԥсныпресс. Аҳәынҭқарра Ахада Иусбарҭа анапхгаҩы Абесалом Кәарҷиа Цандрыԥшь аҳаблеи Приморское ақыҭеи аинтернационалтә бригада «Пиатнашка» аибашьцәа рҭахара иахкьаны имҩаԥысыз алахьеиқәҵаратә усмҩаԥгатәқәа ихы рылаирхәит. Абесалом Кәарҷиа Иҷыдоу арратә операциа амҩаԥгараан Донбасс ахақәиҭтәразы иҭахаз Аԥснытәи аибашьцәа - Шамиль Дасаниеи Марзаҟан Ачбеи рҭаацәа дрыдышшылеит.
Алахьеиқәҵаратә усмҩаԥгатәқәа иара убас рхы аладырхәит аԥыза-министр актәи ихаҭыԥуаҩ Џьансыхә Нанба, Аҳәынҭқарра Ахада Иусбарҭа анапхгаҩы ихаҭыԥуаҩ Адгәыр Ашәба, атәыла Анапхгара алахәылацәа, араионқәа Рхадарақәа рнапхгаҩцәа, аибашьра аветеранцәа, иҭахаз аибашьцәа рыуацәеи рҭынхацәеи, араион ауааԥсыра.
