Аҟәа. Абҵарамза 24, 2023 шықәса. Аԥсныпресс. Очамчыра араион ахада Беслан Бигәаа ҳазҭоу 2023-тәи ашықәс, жәымз ирылагӡаны имҩаԥгаз аусуразы аҳасабырба ҟаиҵеит, ҳәа адырра ҟанаҵоит Telegram-канал «Очамчыра-информ».
«Ииасуа ашықәс аҿы зегьы реиҳа ихадоу проблеманы иҟоу акамшьиа акра иадҳәалоу асезон иахәҭоу аҩаӡараҿы иахьзыиамсыз ауп. Уи иахҟьаны, Очамчыра араион абиуџьет аҿы 80 миллион мааҭ инарзынаԥшуа азымхара шьақәгылеит», – ҳәа иазгәеиҭеит Очамчыра Администрациа ахада.
Иааизакны, ахырхарҭақәа зегьы рыла арбагақәа реиӷьтәра шыҟоу умбар залшо. Ақалақь аиқәыршәазаара иазку аусурақәа мҩаԥысуеит, акоммуналтә маҵзурақәа рҭаххрақәа рзы иҷыдоу атехника аахәара алыршоуп.
Аҵыхәтәантәи ашықәсқа рзы ахатәы ҩнқәа лассы-лассы аӡы рыҵалара зыхҟьоз иахәҭоу аҩаӡаразы аус зымуаз аӡҩаршьҭрақәеи ацрыӡмҩангақәеи рыҭрыцқьаара иазкны мҽхакы ҭбаала аусура мҩаԥгоуп. Араион аҿы аҳаблабжьарамҩақәеи ацҳақәеи реиҭашьақәыргылара мҩаԥысуеит, идыргылоит ашьапылампылмаҷ адәқәеи аспорттә плошьадкақәеи.
Анапхгаратә қыҭанхамҩатә программа аҳәаақәа ирҭагӡаны ақыҭауаа имаҷымкәа ацхыраара рыҭан.
«Ахырхарҭақәа зегьы рыла аусурақәа аринахысгьы ирыцҵахоит! Ҳара зегьы ҳамчи ҳалшарақәеи ааидкыланы аус ааур, хымԥада аихьӡарақәа ҳауеит!» - ҳәа иажәахә аҿы иазгәеиҭеит Беслан Бигәаа.
