Аҟәа. Абҵарамза 23, 2023 шықәса. Аԥсныпресс. Ареспубликатә ахәыҷтәы-қәыԥштә спорттә школ аҿы иалагеит аҳәса ркомандақәа рыбжьара амҵәышәымпыл азы Жәларбжьаратәи атурнир “Аиҩызара Ахраҿа”.
Атурнир зынӡа иалахәуп хә-командак: «РШВСМ», «Гагра», «Аҟәа», «Крылья Абхазии», «Краснодар», ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы Аофициалтә саит.
Абҵарамза 23 рзы имҩаԥысит атурнир аартра иадҳәалоу ацеремониа. Атурнир алахәылацәеи асасцәеи бзиала шәаабеит ҳәа раҳәо иқәгылеит Аԥсны аҿари аспорти русқәа рзы аҳәынҭқарратә Еилакы ахантәаҩы Ҭарашь Ҳагба, Аҟәа ақалақь Ахадара аҿари аспорти русқәа рзы Аусбарҭа анапхгаҩы Ельза Ҳагба, атурнир аӡбаҩ Хада Николаи Гушьини Краснодартәи акоманда азыҟаҵаҩ Мариа Гурковеи.
«Аҿари аспорти русқәа рзы аҳәынҭқарратә Еилакы ахьӡала зегьы ишәыдысныҳәалоит Жәларбжьаратәи атурнир «Аиҩызара Ахраҿа» аартра. Даара иҭабуп ҳәа расҳәоит краснодартәи акоманда ҳтурнир иахьалахәхо азы. Ишәзеиӷьаҳшьоит зегьы ақәҿиарақәа, насгьы даара аинтерес зҵоу ахәмарра ҳшәырбап ҳәа агәыӷра ҳамоуп», – ҳәа иҳәеит Ҭарашь Ҳагба.
Аицлабрақәа мҩаԥыслоит аикәышаратә истема ала. Урҭ хыркәшахоит абҵарамза 26 рзы.
