Аҟәа. Абҵарамза 23, 2023 шықәса. Аԥсныпресс. RCC Boxing Promotions адиректор Хада Герман Титов «Матч ТВ» ахаҭарнакцәа дрыҿцәажәо, Харитон Агрба ҳазҭоу ашықәс нҵәаанӡа актәи абжьарабжатә акапантә категориа иаҵанакуа рыбжьара WBA апретендент истатус иоур алшоит ҳәа инаҵшьны иазгәеиҭеит. Абри азы адырра ҟанаҵоит Аԥсны аҿари аспорти русқәа рзы аҳәынҭқарратә Еилакы аофициалтә саит.
2019 шықәсазы имҩаԥысуаз Европатәи ахәмаррақәа рҿы араӡнытә аԥхьахә згаз Харитона Агрба иактив аҿы иҟоуп 12 иааира апрофессионалтә ринг аҿы. Уи актәи абжьарабжатә акапантә категориа иаҵанакуа рыбжьара WBA ареитинг аҿы ажәабатәи аҭыԥ ааникылот. Иарбоу адивизион аҿы америкатәи аспортсмен Роландо Ромеро «ԥсшьара иҟоу WBA ачемпион» истатус имоуп. Харитон Агрба аҵыхәтәантәи иеиндаҭларақәа хԥа RCC Boxing Promotions аҿы имҩаԥигеит.
«Харитон Агрба цәыббрамзазы Алеқсандр Диуран диндаҭлеит. WBA ҳара ҳрацәажәеит ари аиндаҭлара иара ареитинг аԥхьатәи жәа-ҭыԥк дшаланагало азы. WBA ахахьы иагаз зегьы нанагӡеит. Ҳгәыӷуеит, Харитон Агрба ашықәс анҵәамҭанӡа атитул WBA апретендентс дҟалап ҳәа», — иҳәеит Герман Титов.
