Аҟәа. Абҵарамза 21, 2023 шықәса. Аԥсныпресс. Ареспубликатә хәышәтәырҭа инагӡаны автономтә фымцатә еиқәыршәагала еиқәыршәоуп. Амшцәгьақәеи иуадаҩу аҭагылазаашьақәеи ирыхҟьаны иҟалар зылшо афымцала аиқәыршәара аиԥҟьарақәа инарымаданы, амедицинатә усбарҭақәа аӡынтәи аамҭахәҭа ишазхиоу агәаҭара мҩаԥигеит атәыла агәабзиарахьчара аминистр Едуард Быҭәба, ҳәа адырра ҟанаҵоит агәабзиарахьчара Аминистрра апресс-маҵзура.
Ареспубликатә хәышәтәырҭа аҳақьым хада инапынҵақәа назыгӡо Ерик Ҳаҭхәа министр ишизеиҭеиҳәаз ала, ахышәтәырҭаҿы иахьа иҟоуп адизельтә генераторқәа хԥа, ҩба-астацтонартә, акы – амобилтә. Агенератор хада амчхара – 530 киловатт рҟынӡа инаӡоит, аҩбатәи астационартә – 380 кВт, амобилтә генератор амчхара – 80 кВт. рҟынӡа инаӡоит.
«Ҳгенераторқәа зегьы ртехникатә ҭагылазаашьа бзианы иҟоуп, аныхтә-ԥсахгатә материалқәа зегьы ԥсақәуп. Агенератор хада автономтә режим ала аус ауеит. Аиқәыршәагақәа зегьы ртехникатә ҭагылазаашьа бзиоуп, уи аӡынра иазырхиоуп», – ҳәа иҳәеит Ерик Ҳаҭхәа.
Иаҭаххоны иҟалозар Ареспубликатә хәышәтәырҭа амобилтә генератор егьырҭ амедусбарҭақәа рахь ииаугалар алшоит.
Агәабзиарахьчара аминистр Едуард Быҭәба адизельтә генераторқәа ахәышәтәырҭа аҿы русура азҵаара ахылаԥшра аҭара азы анапынҵа риҭеит.
«Иарбанызаалак амедицинатә усбарҭақәа афымцамч аҟынтәи раҿыхра – апациентцәа, аиҳарак ҿыц ииз аԥшқақәа ргәабзиареи рыԥсҭазаареи ӷәӷәала ашәарҭара иҭанаргылоит. Араҟа ҳара агха азы азин ҳамаӡам», – ҳәа иҳәеит Едуард Быҭәба.
