«Ҳара иаҳҭахын иҿыцу ачыс хкқәа рцәыргареи Аԥсны ауааԥсыра урҭ ргьама баны ицәыргақәҵоу аалыҵ азы ргәаанагара рҳәарц. Уажәы  ахш азымхара апроблема цәырҵны иҟоуп, убри аҟнытә ҳара ҳапроект иалаху аҳәса-афермерцәа ирзыҟаҵо акыр ипопулиару балкантәи ачысхкқәа рцәыргара ҳаӡбеит», – ҳәа иҳәеит иара.

Адигустациа аҿы ицәыргақәҵан  аҭыԥантәи афатә аалыҵ иалху ачысқәа рассортимент ду. Асасцәа каимак, пекмез, аивар, македонтәи ацыфа, балкантәи лиутеница, уҳәа реиԥш иҟоу балкантәи ачысхкқәа ргьама абара азы алшара рыман.

Аплошьадка «Гәыма» аҿы иара убас имҩаԥысит еиуеиԥшым афермертә аалыҵ ацәыргақәҵа.

Апроект аспециалист Лана Сангәлиа лажәақәа рыла, балкантәи ачысхкқәа рыҟаҵараан аиҳарак рхы иадырхәоит апомидор, болгартәи апарпыл хаа, аҟандыл.

Апроект аҳәаақәа ирҭагӡаны Еиду амилаҭқәа Реиҿкаара иатәу Афатә аалыҵи ақыҭанхамҩатә аалыҵтәии реиҿкаара Аҟәа иҟоу рофис аҳәса-афермерцәа атехникатә цхыраара рыҭареи балкантәи ачысхқәа рыҟаҵара дырҵареи азԥхьагәаҭаны иамоуп. Ари анаҩстәи апроект ауп, уи адегустациа аихшьаалақәа рыла иааиуа ашықәс азы инагӡахоит.