«Ансамбльқәа рҟазара» аноминациа аҿы Аиааира еицеиҩыршеит ҩ-гәыԥк Надежда Черемныхи Наталиа Белоколенко-Каргини, Алеқсандра Акишинеи Мариа Зеленини.

Аҩбатәи аҭыԥ - Иулиеи Ивани Покровскиаа.

Ахԥатәи аҭыԥ ааныркылеит Ольга Шишенко, Улиана Петрова, Мариеи Дисеславеи Бобринаа, Иулиа Архангельскаиа, Алеқсандр Куликов.

Аноминациа «Академиатә ахкы анагӡара» аноминациа аҿы актәи аҭыԥ ааникылеит - Владислав Бириуков. Артист иара убас иҷыдоу априз ианашьахеит -  атеатр «Геликон-Опера» асценаҿы ахкынагӡаратә концерт, аҩбатәи - Валериа Лобанова, Кристина Попова, Екатерина Шпильман, ахԥатәи аҭыԥ иаԥсахеит Аркади Демидов, Изабелла Мерман, Мариа Самусева, агран-при - аԥсуа шәаҳәаҩы Софиа Сақаниаԥҳа.

Аицлабра иаиааизи адиплом занаршьази ргала-концерт Давид Терзиан напхгара зиҭо Аԥсны Аҳәынҭқарратә камертә оркестри Нхыҵ Уаԥстәыла жәлар рартист Заурбек Гугкаев напхгара зиҭо Уаԥстәыла аҳҭнықалақь Владикавказ иҟоу Мариинсктәи атеатр афилиал Асимфониатә оркестри алахәны имҩаԥысит.

Аконкурс алахәхара аҟынтәи ироуз ацәаныррақәа ртәы Аԥсныпресс акорреспондент иҿцәажәо ирҳәеит «Ансамбльқәа рҟазара» аноминациа аҿы аиааира згаз Алеқсандра Акишинеи Мариа Зеленинеи. «Ҳара машәыршақәа ауп ари аконкурс атәы шҳаҳаз. Иаразнак уи ҳҽалаҳархәыргьы ҳҭаххеит.

Ҳара уажәада ахаангьы Аԥсныҟа ҳмааӡацызт, уи ҳара ҳзы даара аинтерес аҵан. Ҳара даара иџьаҳшьеит иагьаҳгәаԥхеит шәара шәфилармониеи шәмузыкатә ҵараиурҭеи. Аиашазы араҟа даара ауаа бзиақәа рацәаны иҟоуп. Даара ҳаигәырӷбоит Аԥсныҟа ҳаартә еиԥш алшара ахьҳауз. Убасҵәҟьа иазгәҳҭар ҳҭахуп аконкурс алахәылаца зегьы рзанааҭтә дырра аҩаӡара акыр ишыҳараку. Урҭ зегьы акыр имариам, игәылҭәаау  апрограмма рымоуп».