Аҟәа. Абҵарамза 2, 2023 шықәса. Аԥсныпресс. 2023 шықәса 9 мыз ирылагӡаны ахархәара зауз афымцамч ахәԥса ашәара 35,3% рҟынӡа инаӡеит, урҭ рахьынтә аиуристтә хаҿқәа рҟынтәи – 69%, хазхаҭалатәи ахаҿқәа рҟынтәи 20% иреиҵаны. 9 мыз рыла иалагалаз ашәатәқәа рзеиԥш еицҵалыҵ 632 млн. мааҭ рҟынӡа инаӡоит. 2022 – 2023 шш. Аԥсны асоциал-економикатә ҿиара азы аҳәынҭқарратә программа анагӡара иазкны имҩаԥгаз аилатәара аҿы абри азы адырра ҟалҵеит атәыла аԥыза-министр ихаҭыԥуаҩ, аеконоика аминистр Кристина Озган.
Ҳазҭоу ашықәс 10 мыз рыла ахархәара зауз Егрытәи Аӡфымцатә станциа иаунажьуа афымцамч 1,6 млрд кВт/с. рҟынӡа инаӡоит, уи 2022 шықәсазы аиԥш-зеиԥшу аамҭахәҭа иаҿырԥшны уахәаԥшуазар, 200 млн кВт/с. рыла еиҵоуп.
2023-2025 шш. рзы Аинвестициатә программа анагӡара аҳәаақәа ирҭагӡаны Астанцеиҵа-11 кВ «Аҟәа-1», Астанцеиҵа - 110 кВ «Алаҳаӡы» рҿы имҩаԥысуаз ареконструкциатә усурақәа ахыркәшарахь инеит. Иара убас ахырәшарахь инеихьеит Астанцеиҵа-220 кВ «Бзыԥ» аҿы аусурақәагьы.
Аҳаирбаӷәаза ареконструкциа аҳәаақәа ирҭагӡаны астанцеиҵақәа «Дранда», «Агәыӡера» рҿы шьаҭанкыла аиҭашьақәыргыларатә усурақәа рымҩаԥгара азԥхьагәаҭоуп. Аҳәынҭқарра-хазхаҭалатәи апартниорра азы Аиқәшаҳаҭра инақәыршәаны иарбоу аусурақәа рфинанстәра аинвестор ихарџь ала имҩаԥгахоит.
Ареспубликатә Унитартә Наплакы «Амшынеиқәафымцамч» афымцамч ахархәаҩцәа ринвентаризациа амҩаԥгара иалагеит. Иарбоу аусурақәа рхыркәшара аҽҳәара – ԥхынҷәкәынмза 2023 шықәса.
Ареспубликатә биуџьет аҟынтәи Ареспубликатә Унитартә Наплакы «Амшынеиқәафымцамч» агәаҭаратә приборқәа раахәареи рышьақәыргылареи рзы иазоужьхеит 200 млн. мааҭ.
Иахьазы иаахәоуп 26 372 цыра аԥхьаӡагақәа, урҭ рахьынтә 21 872 цыра шьақәыргылахеит.
Убри аангьы 300 млн. мааҭ рыхә афымцамч ахархәразы априборқәа аԥсуа ган аҭаразы азҵаара ақәыршаҳаҭраҟынӡа анагара мҩаԥысуеит.
