Аҟәатәи Иреиҳаӡоу азеиԥшартә командаҟаҵаратә ҵараиурҭа раԥхьатәи амшқәа инадыркны арҵаҩцәа, анапхгаҩцәа, зхаҭабзиара ҳаракӡоу аҵарадырраиура рыла ахьӡ-аԥша рылаҵәеит. 23 шықәса рыҩныҵҟа аҵараиурҭа Арратә мчқәа рзы иазнархиеит хыԥхьаӡара рацәала афицарцәа. Урҭ рҟынтәи жәпаҩык Атәылахьчара аминистрра аҳамҭақәа ранашьоуп. Аҵараиурҭа аушьҭымҭацәа Атәылахьчара аминистрраҿы, Арратә мчра аилазаараҿы иааныркылоит аҭыԥ ҳаракқәа. Уи уамеигәырӷьар залшом.
Ари аҵараиурҭа арҵаҩцәа ракәзар, урҭ рҿаԥхьа иқәгылоу аҳәынҭқарратә хыдҵа еилкааны, ҭакԥхықәрала рмаҵуратә уалԥшьа анагӡара иаҿуп.
Аҟәатәи Иреиҳаӡоу азеиԥшартә командаҟаҵаратә ҵараиурҭа апрофессор-рҵаҩратә еилазаара иааиԥмырҟьаӡакәа аҵара-ааӡаратә процесс аиӷьтәра иаҿуп, Урыстәыла инагоу арратә ҵараиурҭақәа аус рыцура аҳәаақәа дырҭбаауеит», - ҳәа иазгәаҭоуп аминистр иҟаиҵаз адныҳәалара аҿы.
Владимир Ануа арҵаҩцәеи акурсантцәеи агәабзиара зҩыда, аҭынчра, аманшәалара, набыцра зқәым акурсанттә ешьара, Аԥсадгьыл ахьӡала ԥхьаҟагьы аизҳазыӷьара рзеиӷьаишьеит.
Жьҭаарамза 31, 2000 шықәсазы иаԥҵаз Аҟәатәи азеиԥшартә командаҟаҵаратә ҵараиурҭа Арра-ҵаратә центр инаркны Иреиҳаӡоу аҵараиурҭаҟынӡа амҩа ианысит, адырра ҳарак змоу афицартә кадырқәа азыҟазҵо Аԥсны Аҳәынҭқарра Атәылахьчара аминистрра аҵараиурҭа хаданы иҟалеит.
