Аҟәа. Абҵарамза 1, 2023 шықәса. Аԥсныпресс. Жьҭаарамза 31 рзы имҩаԥысит XVII ареспубликатә арра-спорттә хәмарра «Аиааира» аартра иазку аныҳәатә усмҩаԥгатә, ҳәа адырра ҟанаҵоит аҵара Аминистрра апресс-маҵзура.
Ишьақәгылаз атрадициала уи атәылахьчара Аминистрра артиллериатә база аҿы имҩаԥысуеит.
Сынтәа арра-спорттә хәмарра 1992 – 1993 шш. Аԥсны жәлар Рџьынџьтәылатәи еибашьра аҟны Аиааира агара Амш 30-шықәса ахыҵреи Урыстәылатәи Афедерациа ала Аԥсны Аҳәынҭқарра ахьыԥшымра азхаҵара ҟалеижьҭеи 15-шықәса аҵреи ирызкны мҩаԥысуеит.
Атәылахьчара Аминистрра ахьӡала арра-спорттә хәмарра алахәылацәа рахь адныҳәаларатә ажәахә ҟаиҵеит атәылахьчара аминистр ихаҭыԥуаҩ, аполковник Давид Бжьаниа.
«Ахәмарра аҿы шәара ауникалра злоу аинтерес зҵоу аԥышәа шәоуеит. Уи жәаҳәарада аԥсҭазаараҿы ишәыхәоит. Уи даара акыр аҵанакуеит», – ҳәа иазгәеиҭеит Давид Бжьаниа.
Ахәмарра алахәылацәа дрыдныҳәало аҵара аминистр Инал Габлиа иҳәеит:
«Ишәыдысныҳәалоит XVII Ареспубликатә арра-спорттә хәмарра «Аиааира» аартра. Агәра ганы сыҟоуп шәара зеиӷьаҟам ала шәдыррақәеи шәылшарақәеи раарԥшра шшәылшо. Аманшәалареи ақәҿиарақәеи шәзеиӷьасшьоит!»
Инал Габлиа атәылахьчара Аминистрра, агәабзиарахьчара Аминистрра, аҩныҵҟатәи аусқәа Рминистрра ахәмаррақәа реиҿкаараҿы иҟарҵаз ацхыраара азы иҭабуп ҳәа иҳәеит.
Арра-спорттә хәмарра «Аиааира» апатриоттә зыҟаҵара аҳәаақәа ирҭагӡаны имҩаԥысуеит. Уи иалагалоуп ацәаҳәақәгыларатә зыҟаҵарақәа, ақәырҟьа аҟынӡа аҽышьҭыхра, автомат аимыхреи аибыҭареи, 100, 800 , 1000 метра рҟынӡа инаӡо адистанциақәа рыла аҩра, агранатақәа рыршәра, автомат ала ахысра, ахыци ахәымпали рыла ахысра, аӷбашаха ахара, еилаԥсоу арра-спорттә естафета, иара убас аконкурс анҭыҵ атопографиеи аҭыԥ аҿы ахырхарҭа аԥшаара.
Ашколхәыҷқәа рыбжьара Ареспубликатә арра-спорттә хәмарра «Аиааира» атәылахьчара Аминистрра ацхыраарала 2004 шықәса инаркны есышықәса имҩаԥысуеит. Уи рхы аладырхәуеит Аԥсны араионқәа зегьы рҟынтәи 10-тәи, 11-тәи аклассқәа рҵаҩцәа.
