Аҟәа. Жьҭаарамза 30, 2023 шықәса. Аԥсныпресс. Жьҭаарамза 29 инаркны абҵарамза 3, 2023 шықәса аҟынӡа Аҟәа ақалақь, Ацентр «Проспект» аҿы Аԥсны ахьатә бнара аиқәырхара апроблема иазку афотоцәыргақәҵа мҩаԥысуеит. Уи азы агәазыҳәара змоу зегьы арҭ аҵлақәа иуникалтәу рҟазшьарбагеи урҭ реиқәырхаразы иҟаҵоуи иазԥхьагәаҭоуи ртәы еиҳаны аилкааразы алшара рымоуп.
Ахәаша, абҵараза 3 рзы Аԥсны ахьатә бнара аиқәырхара апроблема иазку адокументалтә фильм дырбара еиҿкаахоит. Уи Еиду Амилаҭқәа Реиҿкаара иатәу Афатә-ажәтәи ақыҭанхамҩеи Реиҿкаара (ФАО ООН) апроекттә офис иҟанаҵаз адгылара иабзоураны иҭыхын
35 минуҭ ицо афильм аҿы иарбоуп ахьатә бнара актуалра злоу аекологиатә проблемақәеи ахьа аԥсуаа рыԥсҭазаараҿы иааннажьыз аҭоурых-культуратә шьҭа.
«Ари аусмҩаԥгатә — ахьатә ҵлақәа реиқәырхара апроблемеи уи аӡбаразы иҟоу аеффективра злоу астратегиақәеи ртәы аилкааразы зеиӷьаҟам лшароуп», – ҳәа иазгәарҭоит аусмҩаԥгатә аиҿкааҩцәа.
Ацәыргақәҵа Еиду Амилаҭқәа Реиҿкаара иатәу Афатә-ажәтәи ақыҭанхамҩеи Реиҿкаара (ФАО ООН) апроекттә офис ала инагӡахо апроект «Аԥсны абнарақәеи ақыҭанхамҩеи иҭышәынтәаланы рыҿиара» аҳәаақәа ирҭагӡаны имҩаԥысуеит.
