Аҟәа. Жьҭаарамза 31, 2023 шықәса. Аԥсныпресс. Аконтрабаҭ аҿагылареи аҳазылхратә зинеилагарақәа рыԥхьырҟәҟәаареи рзы аҟәша аусзуҩцәа аҳазылхратә ԥыԥшырҭа «Ԥсоу» аҳазылхратә гәаҭара азона иахьаҵанакуа Аԥсны атәылауаҩ зыԥсҟы икыз автомашьына агәаҭара мҩаԥыргеит. Ари аусмҩаԥгатә аан амашьына аԥхьатәи ахәҭа аҿы ирыԥшааит Аԥсны аҳазылхратә ҵакыра ахь алагаларазы аԥкрақәа шьақәыргылоу акриптовалиута арҳаразы 21 аппарати урҭ рыԥсахгахәҭақәеи - 100 цырак рҟынӡа амҩангагақәа, 40 цыра афымца ԥшандагақәа, иара убас 11 адренажтә ӡхагалагақәа.
Аҳәынҭқарратә ҳазылхратә Еилакы аофициалтә саит иҟанаҵо адыррақәа рыла, иарбоу административтә зинеилагара азы аматериалқәа зегьы аусеилыргаанӡатәи ахәаԥшразы Аԥсны аҳәынҭқарратә ҳазылхратә Еилакы аҭҵаареи аҳазылхратә усеилыгарақәеи рыҟәша ахь инашьҭуп.
