Аҟәа. Жьҭаарамза 25, 2023 шықәса. Аԥсныпресс. Афедерациа Ахеилак апленартә еилатәара аҿы Урыстәылатәи Афедерациа аҟынтәи аҳазылхратә баџь ахшәаарада Аԥсны Аҳәынҭқарра аҳазылхратә ҵакыра ахь ииагахо атауарқәа рсиа апропан ҳәа изышьҭоу агаз алагалара азы Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра аиҭакрақәа ралагалара азы Апкаанҵа аратификациа азы азакәан адкылара иақәшаҳаҭхеит, ҳәа адырра ҟанаҵоит Аинформациатә Агентра «ТАСС».
«Лаҵарамза 28, 2012 рзы «Атауарқәа рыла ахәаахәҭра арежим азы Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра» аиҭакрақәа ралагалара азы Апкаанҵа анапаҵыҩра мҩаԥысит лаҵарамза 16, 2023 шықәса рзы Москва ақалақь аҿы. Уи Урыстәылатәи Афедерациа аҟынтәи аҳазылхратә баџь ахшәаарада Аԥсны Аҳәынҭқарра аҳазылхратә ҵакыра ахь иалагалахо атауарқәа рсиа апропан ҳәа изышьҭоу агаз ацҵара азԥхьагәанаҭоит.
Лаҵарамза анҵәамҭа инаркны Москва ақалақь аҿы знапаҵыҩра мҩаԥгаз Апкаанҵа аамҭала ахархәара аиуоит. «Апкаанҵа аамҭала ахархәара зыдҳәалоу апропан ахымԥадатәра аганахьала актәи аҭыԥ аҿы игылоу атауарқәа иахьреиуоу ауп. Убри аан аенергетикатә дефицит аҟазаара аҭагылазаашьа аан, Аԥсны Аҳәынҭқарра ауааԥсыра шықәсак ала 2 нызықь тонн инарзынаԥшуа арацәаӡритә иӡшьартәу агазқәа рыла реиқәыршәара аларшара хымԥадатәны иҟоуп», - ҳәа иазгәаҭоуп аилыркаагатә нҵамҭа аҿы.
Апкаанҵа азинмчы аиуоит аганқәа рыла уи азы ихымԥадатәиу аҳәынҭқарраҩныҵҟатәи апроцедурақәа зегьы шынагӡоу ала шәҟәыла еиқәыршәоу адырра адипломаттә каналқәа рыла аиура аналыршахалак ашьҭахь.
