Аҟәа. Жьҭаарамза 25, 2023 шықәса. Аԥсныпресс. Аԥсны Жәлар Реизара-Апарламент жәларбжьаратәи, апарламентбжьаратәи аимадарақәеи аидгьылуаа рымадареи рзы апарламенттә Еилакы аилатәараҿы «Лаҵарамза 28, 2012 рзы «Атауарқәа рыла ахәаахәҭра арежим азы Аԥсны Аҳәынҭқарра Анапхгареи Урыстәылатәи Афедерациа Анапхгареи ирыбжьарҵаз Аиқәшаҳаҭра» аиҭакрақәа ралагалара азы Апкаанҵа» аратификациа азы» Аԥсны Аҳәынҭқарра азакәан апроект иахәаԥшит.
Ари азакәан апроект аҿы Урыстәылатәи Афедерациа аҟынтәи аҳазылхратә баџь ахшәаарада Аԥсны Аҳәынҭқарра аҳазылхратә ҵакыра ахь иалагалахо атауарқәа рсиа ацҵара азы аԥшьгара ҟаҵоуп. Араҟа, ахәҭакахьала излацәажәо агаз пропан ауп.
Иарбоу азакәан апроект азы адепутатцәа рҿаԥхьа аинформациа ҟаиҵеит атәыла аекономика аминистр ихаҭыԥуаҩ Ҭеимураз Миквабиа.
Аилацәажәара ашьҭахь аилак алахәылацәа Апарламент иааиуа асессиа аилатәара аҿы ари азакәан апроект рыдыркыларц азы абжьгара аҟаҵаразы аӡбамҭа рыдыркылеит.
Ахаша, жьҭаарамза 25 рзы, Урыстәылатәи Афедерациа Ахеилак аҿы абаџь ахшәаарада апропан Аԥсныҟа аагаразы азакәан азинмчы аҭара иақәшаҳаҭхеит.
