Аҟәа. Жьҭаарамза 25, 2023 шықәса. Аԥсныпресс. Апрокурор Хада Адгәыр Агрба аӡбаҩцәа Рыквалификациатә коллегиа ахь Ҭҟәарчалтәи аӡбарҭа аӡбаҩ – Ҭҟәарчалтәи араионтә ӡбарҭа ахантәаҩы инапынҵақәа назыгӡо аӡбаҩ Ажьиба Викториа Рудольф-иԥҳа лганахьала ашшԥхьыӡ дәықәиҵеит.
Апрокуратура Хада аофициалтә саит аҿы иҟоу адыррақәа рыла, ашшԥхьыӡ дәықәҵоуп Ажьиба В.Р. лхантәаҩрала ақәҵарақәеи азыӡбақәеи рыдкылараан ашьустә закәанеидкылеи ашьаусҩаԥгаратә закәанеидкылеи реилагара аарԥшра инамаданы.
Ашшыԥхьыӡ атекст аҿы аусмҩаԥгаратә закәанԥҵара ӷәӷәала аилагарақәа ирыхҟьаны еиҳау аӡбарҭақәа рҿы зганахьала ақәҵарақәеи азыӡбақәеи аԥыхыз ашьаусеилыргарақәа еиқәыԥхьаӡоуп.
Апрокуратура Хада иарбоу ашшԥхьыӡ ахәаԥшреи, анаҩс уи аихшьаалақәа рыла аӡбаҩ Викториа Рудольф-иԥҳа Ажьиба ҽҳәараанӡа лзинмчы аанкылара азы аӡбамҭа адкылареи рзы Аквалификациатә коллегиа ахь аҳәара ҟанаҵоит.
