Астанцеиҵа «Аҟәа» аҿы ареконструкциатә усурақәа рымҩаԥгара ашьҭахь амчхара 80 МВт. рҟынӡа ишьҭыххоит. 

Аҟәа ақалақь, Џьонуа, Гәлиа, Воронов, Коӷониа, Абазаа рымҩақәа рҿы аиқәыршәазааратә усурақәа мҩаԥысуеит.  

Гәылрыԥшь араион аҿы автомҩақәа реиҭашьақәыргылара иазкны ԥшь-усмҩаԥгатәк азԥхьагәаҭоуп, урҭ рахьынтә хԥа хыркәшоуп.  

Ҭҟәарчал араион аҿы Ҭҟәарчали Аҟармареи еимаздо амҩа (16 км) шьаҭанкыла аиҭашьақәыргылара иазку аусурақәа мҩаԥысуеит, урҭ  2024 шықәсазы ихыркәшахоит.  Ҭҟәарчал ақалақь, Ахақәиҭра Апроспект  аҿы аӡымҩангага аиҭашьақәыргылара мҩаԥысуеит.

Аҟәеи Очамчыреи еимаздо амҩа арлашара нагӡоуп, уи иадҳәаланы ҩ-етапкны имҩаԥгаз аусурақәа ирықәхарџьхеит 175 млн. мааҭ.  

2023 шықәсазы Гәылрыԥшь араион аҿы Икьакьоу Абзазаратә Црыҵқәа Рполигон аҿы аиқәыршәзаара иадҳәалоу аусурақәа хыркәшахоит.   

Зеицҵалыҵ 270 млн. мааҭ рҟынӡа инаӡо Ареспубликатә биуџьет ахатә хархәагақәа  рыла 74 усмҩаԥгатә анагӡара азԥхьагәаҭан, урҭ рахьынтә 48 хыркәшоуп, егьырҭ ашықәс нҵәаанӡа инагӡахоит. Иазԥхьагәаҭоу аусмҩаԥгатәқәа рхыԥхьаӡараҿы иҟоуп асоциалтә зкызаара змоу аобиектқәа.

Аԥсны Аҳәынҭқарра Ахада Ирезервтә фонд ахарџь ала рфинанстәра мҩаԥгоуп 23 рҟынӡа аҳәынҭқарратә контракт.  Имҩаԥгаз афинанстәра азеиԥш еицҵалыҵ 13 млн. мааҭ рҟынӡа инаӡоит.  Инагӡоуп 19, егьырҭ анагӡара мҩаԥысуеит.  Зыӡбахә аагоу аусмҩаԥгатәқәа рхыԥхьаӡараҿы иҟоуп аԥсабаратә рыцҳарақәа рыхҟьа-ԥҟьақәа рықәгареи аԥсабаратә рыцҳарақәа рыԥхьырҟәҟәаареи иазку аусурақәа рынагӡара, ацҳақәа рыргылара, аҵаргәатә ҭыӡқәа рырӷәӷәара.   

Аминистрцәа Реилазаара Арезервтә фонд ахархәагақәа рыла иҩаԥган 39 усмҩаԥгатә. Урҭ ирықәхарџьхеит 142 млн. мааҭ, инагӡоуп  - 31.   

Иазԥхьагәаҭоу аусмҩаԥгатәқәа рхыԥхьаӡараҿы иҟоуп аспорттә плошьадкақәа, ашколқәа, уҳәа егьырҭ аусбарҭақәа.