Аҟәа. Жьҭаарамза 24, 2023 шықәса. Аԥсныпресс. Колумбииа, Барранкилиа ақалақь аҿы ихыркәшахеит адомино азы IV адунеи ачемпионат. Уи ахы аланырхәит Аԥсны акоманда.
Атурнир мҩаԥысуан жьҭаарамза 15 – 22, 2023 шықәа рзы. Ари Колумбиа раԥхьаӡа имҩаԥысуа адунеи ачемпионат ауп, «Femundo» аверсиа аҭоурых аҿы акәзар уи аԥшьбатәи ачемпионат ауп. Адунеи зегьы аҟынтәи 400-ҩык инареиҳаны алахәылацәа аиндивидуалтәи ҩыџьа-ҩыџьалатәи аразриад аҿы еиндаҭларц азы Барранкилие ақалақь аҿы аотель El Prado еизеит.
Аԥснытәи акоманда аилазаара нагӡаны ачемпионат ахь изымааӡеит, избан акәзар, акоманда ахәмарыҩ хада уи аамҭазы Лас-Вегас имҩаԥсуаз домино азы адунеи ачемпионат далахәын. Ус ишыҟазгьы, аԥснытәи акоманда ибзиоу алҵшәақәа аанарԥшит, уи колумбиатәи ателехәаԥшра ажурналистцәеи арепортиорцәеи рылаԥш иҵамшәакәа иаанымхеит. Аԥсны еизгоу акоманда иазкны ҷыдала арепортаж ҟарҵеит. Акоманда ақаԥдани азыҟаҵаҩи Саид Ашәба El HERALDO акорреспондент диҿцәажәо иазгәеиҭеит: «Атурнир даара иҳараку аҩаӡараҿы еиҿкаауп. Сара даара сеигәырӷьоит ҳкоманда уи ахьҽаланархәуа. «Ла Арносу» ахь схы рханы иҭабуп ҳәа сҳәар сҭахуп адкылара бзиаӡа азы, аҭак аҳасабала сыԥсадгьыл ахь ааԥхьарагьы ҟасҵоит», – ҳәа иҳәеит иара.
Ҭемыр Лакрбеи Виачеслав Касланӡиеи ҩыџьа-ҩыџьа аицлабрақәа раан 22 тәи аҭыԥ ааныркылеит.
Хаҭалатәи азшьа аҿы Саид Ашәба аҵыхәтәантәи атур аҟынӡа днаӡеит, аха даҵахеит, иара убри ала аиааира ицәцеит. Акәаталақәа реихшьаала ала иара хазхаҭалатәии хаҭалатәи азшьақәа рҿы 20-тәи аҭыԥ ааникылеит.
Раԥхьаӡа акәны адомино азы адунеи ачемпионат рхы аладырхәит Аинар Какалиеи Виачеслав Касланӡиеи.
