Аҟәа. Жьҭаарамза 19, 2023 шықәса. Аԥсныпресс. Аԥсни Никарагууеи рхаҭарнакцәа онлаин режим ала реиԥылара мҩаԥысит жьҭаарамза 18 рзы Аԥсны аҿари аспорти русқәа рзы аҳәынҭқарратә Еилакы аҿы. Аԥсны аганахьала аиԥылара рхы аладырхәит ашахматқәеи анапылампыли рфедерациақәа рыпрезидентцәа Контантин Ҭыжәбеи Аслан Ҭырқьбеи; Никарагуа аганахьала – Никарагуатәи аспорт Аинститут ахаҭарнакцәа Фредди Араика, Алексис Аргуелио ихьӡ зху Аспорттә Еиҿкаара ахаҭарнакцәа Даниель Секеиреи Паола Гутиерресии, аспорт ахкқәа рзы афедерациақәа рхаҭарнакцәа.
Никарагуа ахаҭарнакцәа атәыла аҿы аспорт апопулиаризациа, аспорт аполитика аҿиареи аӡыргареи шымҩаԥысуа атәы еиҭарҳәеит, аспорт ахкқәа рзы афедерациақәа инарыгӡо аусура иазааҭгылеит.
Константин Ҭыжәбеи Аслан Ҭырқьбеи никарагуатәи рколлегацәа ирзеиҭарҳәеит Аԥсны ашахматқәеи анапылампыли рҭоурыхи рыҿиареи ртәы, аԥснытәи аспортсменцәа жәларбжьаратәи арена аҿы ирымоу ақәҿиарақәеи иарбоу аспорт ахкқәа рыҿиареи рпопулиаризациеи рганахьала афедерациақәа имҩаԥырго аусуреи ирзааҭгылеит.
