Аԥсны аҿари аспорти русқәа рзы аҳәынҭқарратә Еилакы ахантәаҩы Ҭарашь Ҳагба убасҵәҟьа атурнир аҿы еизаз зегьы дрыдныҳәалеит.

«Аҿари аспорти  русқәа рзы аҳәынҭақрратә Еилакы ахьӡала ҳара Аԥсны жәлар Рџьынџьтәылтәи еибашьра аҿы Аиааира агара Амш 30 – шықәса ахыҵра иазкны иахьа имҩаԥааго атурнир аартра шәыдаҳныҳәалоит.  Шәара ижәдыруеит ҳаиҳабацәа шәареи ҳареи иахьа аиҩызара бзиа ҳабжьазарц, ҳаҿиаларц, ԥхьаҟатәи ҳԥеиԥш бзиахарц азы иҟарҵаз акыр ишырацәоу. Идуӡӡаны иҭабуп ҳәа шәасҳәоит есышықәса имҩаԥааго аспорттә усмҩаԥгатәқәа шәахьҽлылашәырхәуа.

Зымаха-зышьаха еибгам рыбжьара ашьапылампыл азы Урыстәыла еизгоу акоманда азыҟаҵаҩ еиҳабы Руслан Герзышев аԥсуа ган ахаҭарнакцәа иҭабуп ҳәа реиҳәеит атурнир ахалархәразы ироуз алшара азы. 

«Аԥснытәи ҳашьцәа иҭабуп ҳәа расҳәарц сҭахуп есышықәса иҳарҭо ааԥхьаразы, ҳара ҳзы уи акыр аанагоит. Шәара, арԥарцәа, ишәзеиӷьасшьоит ақәҿиарақәеи аманшәалареи, ахәахәа-чахәарада ахәмаррақәа рымҩаԥгареи», - ҳәа иазгәеиҭеит иара.

Апаралимпиатә акомитет ахантәаҩы Леон Ҵәыџьбагьы аспортсменцәа ақәҿиарақәа рзеиӷьаишьеит.  

«Сара даара иахьа абра шәбара сеигәырӷьоит, гәыкала ишәзеиӷьасшьарц сҭахуп аҭынчра, анасыԥ, агәабзиара. Еиҳа зылшо акоманда аиааиааит», - ҳәа иҳәеит Леон Ҵәыџьба.

Атурнир аартра иадҳәалаз ацеремониа рхы аладырхәит Аҳәынҭқарра Ахада аспорт азы иабжьгаҩ Ахра Ашәба, Аԥсны ашьапылампыл Афедерациа Апрезидент Шабаҭ Логәуа.