Аинвалидцәа Рфонд ахантәаҩы Дмитри Ҭарба Нестор Гадлиа дидныҳәалеит, анаҩс аџьшьаратә шәҟәы ианеишьеит.

Афонд ахантәаҩы ихаҭыԥуаҩ Емзар Ашәуа Нестор Гадлиа ԥхьаҟатәи аиндаҭларақәа рҿы ақәҿиарақәа изеиӷьаишьеит.

«Ҳара иаҳҭахуп ҳхәыҷқәа зегьы уара уҿырԥшы иқәныҟәаларц.  Ҳара ҳазгәдууп, 10-шықәса мацара шухыҵуагьы, уара адунеи ачемпионны аҟалара ахьулуршаз.  Анаҩстәи уԥсҭазаараҿы ақәҿиара дуқәеи аманшәалареи узеиӷьаҳшьоит», - ҳәа иҳәеит иара.

Тарашь Ҳагба аҿари аспорти русқәа рзы аҳәынҭқарратә Еилакы ахьӡала аинвалидцәа Рфонд аҿы ачемпион иԥылара аиҿкаара ахьалыршахаз азы иҭабуп иҳәеит.  

«Ҳара ааигәа Аиааиреи Ахьыԥшымреи Рымшныҳәа азгәаҳҭон. Уи даара акыр зҵазкуа хҭысуп ҳара зегьы ҳзы. Иреиӷьу аҵеицәа ҳтәыла ахақәиҭра рхы ақәырҵеит. Аветеранцәа ирылшоз зегьы ҟарҵеит иахьатәи аҿар ԥхьаҟа ицаларц. Уи акыр иаԥсоуп. Нестор Гадлиа Ҭырқәтәыла Урыстәыла еизгоу акоманда азы дықәгылон, уи акыр зҵазкуа хҭысуп. Рыцҳарас иҟалаз, ҳара макьаназы аспорт хкқәа рӷьырак ала ҳтәыла ахьӡала ақәгыларазы алшара ҳамаӡам, аха уи аганахьала аусура ҳаҿуп. Нестор Узбекистан аҟынтәи аспортсмент диндаҭланы адунеи аԥхьахәгара аҿы  аиааира игеит»,– ҳәа иҳәеит иара.

Ҭарашь Ҳагба иазгәеиҭеит аҿари аспорти русқәа рзы аҳәынҭқарратә Еилакы аҟыбаҩ злоу ахәыҷқәа есымша рыцхырааразы алшара шамам.

«Ҳара иахьазы 42 спорт хкқәа рыла  14 нызықьҩык аспортсменцәа ҳамоуп», – ҳәа иҳәеит Ҭарашь Ҳагба.

Нестор Гадлиа зегьы адныҳәаларақәеи азеиӷьашьарақәеи адгылареи рзы иҭабуп ҳәа реиҳәеит.

«Адгылара сызҭаз зегьы иҭабуп ҳәа шәасҳәарц сҭахуп. Аветеранцәа ракәымзар, ҳара иахьа анхареи аҵареи аспорт аҽазыҟаҵареи рзы алшара ҳауамызм. Сара сызчемпионхаӡомызт. Шәара ҳтәыла ахьыԥшымреи ахақәиҭреи рзы шәмеибашьыр, ҳара ԥхьаҟатәи ҳԥеиԥш лаша зыҟаломызт», - ҳәа иҳәеит аспортсмен қәыԥш.