Аҟәа. Жьҭаарамза 17, 2023 шықәса. Аԥсныпресс. Гагра араион Гиачрыԥшь ақыҭа амҩа хада аҿы акаҭран ашьҭаҵара иалагеит. Уи иацу ахарџь ахахьы иагеит Гагра араион Ахадара.
Гагра араион Ахадара аофициалтә саит аҿы иҟоу адыррақәа рыла, акаҭран ашьҭаҵара иадҳәалоу аусурақәа жәамш раԥхьа ихацыркын.
Амҩа ԥшь-километрак рҟынӡа инаӡоит. Актәи аетап аҿы 750 метра рҟынӡа амҩа ахәҭа ариашара мҩаԥгахеит, абӷанҷ ықәрыԥсеит, анаҩс акаҭран шьҭарҵеит. Хара имгакәа 500 метра рҟынӡа инаӡо амҩа ахәҭа аҿы аиҭашьақәыргыларатә усурақәа рынагӡара иалагоит.
Гиачрыԥш ақыҭа ахада Аркади Гыруаԥшь иажәақәа рыла, иааизакны ақыҭа ахахьынтәи Ԥсоу аӡиас ала инагоу аҳәынҭқарратә ҳәа аҟынӡа иҟоу амҩа еиҭашьақәыргылахоит.
Ас еиԥш мҽхакы ҭбаала аусурақәа Гагра араион ақыҭақәа рҿы аҵыхәтәантәи 40 шықәса ирҭагӡаны имҩаԥымсӡацызт.