Аҟәа. Жьҭаарамза 16, 2023 шықәса. Аԥсныпресс. Маиҟәаԥҟа аусуратә визитла ицеит Ареспубликатә ҳәынҭқарратә Усбарҭа «Аԥснымедиа» агазеҭ «Аԥсны» аредактор хада Ахра Анқәаби Аԥснытәи аҳәынҭқарратә Университет В.П. Анқәаб ихьӡ зху аԥсуа-дыгатә филологиа Ацентр алаборант еиҳабы Асмаҭ Беииеи.
Аԥснытәи апресса ахаҭарнакцәа ареспубликатә газеҭ «Адыгэ Макъ» аредакциа аколлектив ирԥылеит. Аиԥылараҿы аҩ-редакциак рнапхгаҩцәа аусеицура азҵаарақәа ирылацәажәеит, иара убас адыга бызшәалеи аԥсышәалеи аматериал аҭыжьра аганахьала аԥышәеимдара мҩаԥыргеит.
«Жәҳәарада, аусеицура ҳабжьазар ахәҭоуп. Ҳаамҭазы иарбанызаалак аинформациа асоциалтә ҳақәа рыла абара азы алшара шыҟоугьы, иарбоу аҭыжьымҭа ахкы актуалра шамац иаанхоит. Агазеҭ ианылоит аполитика, ауаажәларратә ԥсҭазаара, акультура, аспорт, уҳәа аусхкқәа рҿы зегьы реиҳа аинтерес зҵоу ахҭысқәа рзы адыррақәа. Уимоу, иазгәаҭатәуп, амилаҭтә бызшәақәа рыла аҭыжьымҭақәа рырҿиара хымԥадатәиуп», - ҳәа иҳәеит Ахра Анқәаб.
Ареспубликатә газеҭ «Адыгэ Макъ» аредактор Хада Саида Мешлок, иарбоу аҭыжьымҭа аԥснытәи рколлгацәа аус рыцура гәахарыла ирыдыркылоит ҳәа инаҵшьны иазгәалҭеит.
«Ҳара гәахәара дула иҳадаҳкылоит агазеҭ «Адыгэ Макъ» аус ацура. Ҳжурналистцәа рыбжьара аԥышәеимдара ашьақәыргылара ацхыраара аҭаразы иҳалшо зегьы ҟаҳҵоит», — ҳәа иҳәеит Ахра Анқәаб.
Агазеҭ «Аԥсны» ахаҭарнакцәа рзы аредакциа «Адыгэ Макъ», иара убас Ареспублика Адыгеиа Амилаҭтә музеи аҿы аекскурсиа еиҿкаахеит.
