Аҟәа. Жьҭаарамза 12, 2023 шықәса. Аԥсныпресс. Атәыла аҩныҵҟатәи аусқәа рминистр Роберт Киут Урыстәылатәи Афедерациа аҩныҵҟатәи аусқәа Рминистрра ашьаусԥшааратә усбарҭа Хада анапхгаҩы ихаҭыԥуаҩ, аполициа аинрал-маиор Андреи Шьуров напхгара зиҭо аделегациа идикылеит.
Аҩныҵҟатәи аусқәа Рминистрра апресс-маҵзура иҟанаҵо адыррақәа рыла, аганқәа аусеилыргаратә усбарҭақәеи аӡбарҭақәеи рҟынтәи зҽызӡо ахаҿқәа рыԥшааразы аусеицура азҵаарақәеи анаҩстәи аусеицуразы азԥхьагәаҭарақәеи ирылацәажәеит, иара убас ашьаусԥшаратә ҟәшеиҵақәа изаамҭанытәиу русеицура алҵшәақәа ахәшьара бзиа арҭеит.
Аиԥылара рхы аладырхәит аҩныҵҟатәи аусқәа рминистр актәи ихаҭыԥуаҩ, акриминалтә милициа анапхгаҩы Руслан Ажьиба, аминистр иабжьгаҩ хада Инал Маршьаниа, аҩныҵҟатәи аусқәа Рминистрра ашьусԥшааратә усбарҭа аиҳабы инапынҵақәа назыгӡо Алхас Габлиа, Аԥсны иҟоу Урыстәылатәи Афедерациа аҩныҵҟатәи аусқәа Рминистрра аофициалтә хаҭарнак Сергеи Голенков.
