Аҟәа. Жьҭаарамза 9, 2023 шықәса. Аԥсныпресс. Аԥсны аҩныҵҟатәи аусқәа Рминистрра аҿы атәыла аҩныҵҟатәи аусқәа рминистр Роберт Киути Урыстәылатәи Афедерациа Афедералтә ҳазылхратә Маҵзура анапхгаҩы ихаҭыԥуаҩ Олег Губаидулини русуратә еиԥылара мҩаԥысит.
Аиԥылара иалахәыз Урыстәылатәи Афедерациа аҳазылхратә усбарҭақәеи Аԥсны аҩныҵҟатәи аусқәа Рминистрра аҟәшеиҵақәеи зыԥшаара мҩаԥысуа атранспорттә хархәагақәа раарԥшреи изакәанымкәа абџьар аҭагалара, анаркотикатә маҭәашьарқәеи урҭ раналогқәеи, иара убас аҭаҭын аалыҵқәеи изакәанымкәа аҳәаа рахгара аԥхьырҟәҟәаара иазкны аоперативтә усмҩаԥгатәқәа реицымҩаԥгара иалацәажәеит.
«Ҳара ахырхарҭақәа зегьы рыла аусеиҿкаара ҳашьҭоуп. Даара ҳаигәырӷьоит иахьа абра шәбара, ҳусура хра злоу алҵшәа аанарԥшыр ҳҭахуп. Уи азы иҳалшо зегьы ҟаҳҵалоит», – ҳәа иазгәеиҭеит Роберт Киут. Урыстәылатәи Афедерациа Афедералтә ҳазылхратә Маҵзура анапхгаҩы ихаҭыԥуаҩ Олег Губаидулин аҳазылхратә усбарҭақәеи Аԥсны аҩныҵҟатәи аусқәа Рминистрреи русеицура ахәшьара бзиа аиҭеит.
«Иахьа ҳколлегацәа – Аԥснытәи аҳазылхыҩцәеи ҳара Афедералтә ҳазылхратә Маҵзуреи иҳамоу алҵшәақәа, Аԥсны аҩныҵҟатәи аусқәа Рминистрра инанагӡаз аусура иабзоуроуп. Шәара, аиашазы инагӡаны ҳаргьы шәреспубликагьы ацхырааразы иахәҭоу аресурсқәеи алшарақәеи шәымоуп», - ҳәа иҳәеит Олег Губаидулин.
Иара Аԥсны аформатнагӡа ала аус ацура дшазхиоу азгәеиҭеит.
Аиԥылара аҿы иара убас Аԥснынтәи Урыстәылаҟа изакәанымкәа амашьынақәа алганы ргара азҵаара иалацәажәеит. Роберт Киут иарбоу азҵаара ареспублика азы аимиџьтә ҵакы змоу акакәны иҟоуп ҳәа иазгәаҭо, аҳазылхратә маҵзурақәа уи аӡбараҿы ацхыраара рыҭара шалыршахо азгәеиҭеит.
Ибжьаҵаз аиқәшаҳаҭрақәа рынагӡара ацәгьоурақәа рхыԥхьаӡара аларҟәра иазкхоит ҳәа агәрагара аадырԥшит аиԥылара иалахәыз.
Аиԥылара рхы аладырхәит аҩныҵҟатәи аусқәа рминистр ихаҭыԥуаҩ Руслан Ажьиба, аминистр иабжьгаҩ Хада Инал Маршьан, Аԥсны иҟоу Урыстәылатәи Афедерациа Афедерлтә ҳазылхратә Маҵзура ахаҭарнак Константин Козлов.
