Аҟәа. Цәыббрамза 29, 2023 шықәса. Аԥсныпресс. Ахәылбыҽха, цәыббрамза 29 рзы Аԥсныҟа иааит Ареспублика Башкортосҭан аделегациа. Аделегациа напхгара аиҭоит ареспублика Ахада Ради Хабиров.
Аԥсни Урыстәылеи ирыбжьоу аҳәынҭқарратә ҳәаа аҿы аделегациа ирԥылеит аԥыза-министр ихаҭыԥуаҩ, аекономика аминистр Кристина Озгани акультура аминистр Даур Ақаҩбеи.
Аделегациа аилазаараҿы иҟоуп – Анапхгара аԥыза-министр Андреи Назарови адәныҟаекономикатә еимадарақәеи аконгресстә усуреи Рминистрра ахаҭарнак Олег Назарови.
Ахәаша ахәылбыҽха Аиааиреи Ахьыԥшымреи Рымшныҳәа азгәаҭара иазку аныҳәатә усмҩаԥгатәқәа рылахәхаразы Аԥсныҟа иааит Нхыҵ Уаԥстәылатәи Ареспублика-Аланиа Ахада Сергеи Мениаило.
Аԥсни Урыстәылеи ирыбжьоу аҳәынҭқарратә ҳәаа аҿы нхыҵ-уаԥстәылатәи аделегациа дырԥылеит Иҷыдоу аҭагылазаашьақәа рзы аминистр Лев Кәыҵниа.
Нхыҵ Уаԥстәылатәи Ареспублика аделегациа аилазаараҿы иҟоуп – Апарламент ахантәаҩы актәи ихаҭыԥуаҩ Мураҭ Тхостов.
