Аҟәа. Цәыббрамза 29, 2023 шықәса. Аԥсныпресс. Аԥсны Аҳәынҭқарра Ахада идҵа инақәыршәаны, Аԥсны жәлар Рџьынџьтәылатәи еибашьра аҿы Аиааира агара Амшныҳәа 30-шықәса ахыҵра аламҭалазы Ареспублика Аԥсны иахьаҵанакуа зехьынџьара аиқәыршәазааратә усурақәа ркомплекс мҩаԥган, ҳәа адырра ҟанаҵоит атәыла аекономиа Аминистрра.
Аԥсны асоциал-економикатә ҿиара ацхыраара аҭара иазку Аинвестициатә программа аҳәаақәа ирҭагӡаны Ԥсоуи Аҟәеи еимаздо ареспубликатә трасса арлашаратә система шьаҭанкыла еиҭашьақәыргылан. «Аҟәеи Очамчыреи еимаздо атрасса ахәҭа арлашаратә усурақәа хыркәшоуп.
Ареспубликатә унитартә наплакы «Аԥснымҩа» Ԥсоуи Егри еимаздо ареспубликатә траса иахьаҵанакуа амҩа иаԥну атерриториа аҿы мҽхакы ҭбаала арыцқьаратә, ашәратә, амҩатә дыргақәа рышьақәыргыларатә, уҳәа аусурақәа мҩаԥнагеит.
Аихамҩатә инфраструктура аиқәыршәазаара азы аусмҩаԥгатәқәа ркомплекс Ареспубликатә унитартә Наплакы «Аԥсны аихамҩа» амчала имҩаԥгоуп. Урҭ рахь иаҵанакуеит: Гәдоуҭа ақалақь аҿы иҟоу аихамҩатә вокзал шьаҭанкыла аиҭашьақәыргылара, Аҟәа ақалақь аҿы иҟоу аихамҩатә вокзал аҿы аиҭашьақәыргылара-рҽеиратә усурақәа рымҩаԥгара, аплатформа «Абаҭаа» аҿы аиҭашьақәыргыларатә усурақәа рымҩаԥгара, уахь иаҵанакуеит адәыӷбадгыларҭа аҿы ашьаҟамҩатә хаҳәцәы ақәҵара, аплатформа абаркьылҭаԥсеи ахыби реиҭашьақәыргылара.
Иара убас Аҟәеи Афон Ҿыци ақалақьқәа рҿы аихамҩатә станциақәа жәаба рестакадақәа реиҭашьақәыргылареи атерминал-логистикатә Центр «Аҟәа» аидарақәа рышьҭаҵарҭа шьаҭанкылатәи аиҭашьақәыргылареи хыркәшахеит.
Гәымсҭа аӡиас ихыу ацҳа аҿы ашәратә усурақәа нагӡоуп. Ацҳа акәша-мыкәша иҟоу аҵакыра аҿы арыцқьаратә усурақәа мҩаԥгоуп. Акультура Аҩни иблыз Аихамҩатә Усбарҭа ахыбреи рҿы ашәқәеи аԥенџьырқәеи ахьаҿаз аҭыԥқәа рцымхәрас абаннерқәа рышьақәыргылара хыркәшахеит.
Аҟәа ақалақь аҿы ақалақь аиқәыршәазаара иазку аусурақәа ирыцҵоуп. Аинвестициатә программа ахарџь ала ақалақь аӡымҩангагатә система, ацрыҵмҩангагатә система, амҩадуқәа рҿы аҩарҭҳәаақәа шьаҭанкыла реиҭашьақәыргылара, иара убас амҩақәа рҿы акаҭран-бетон ашьҭаҵареи иазку аусурақәа мҩаԥгоуп. Џьонуеи Гәлиеи рымҩақәа рҿы ашьаҟамҩатә хаҳәцәы ашьҭаҵара иазку аусурақәа мҩаԥгоуп. Ҳазҭоу ашықәс азы Воронов имҩа аҿы акоммуникациақәа рыԥсахреи анаҩс акаҭран-бетонтә ҿыгҳара ҿыц ашьҭаҵареи иадҳәалоу аусурақәа хацыркын. Аиԥш-зеиԥшу аусурақәа аҳҭнықалақь, Коӷониа имҩалагьы имҩаԥгахоит.
