«Аибашьра анеилга ашьҭахь хара имгакәа ҳара, Агуманитартә Программақәа Рцентр аусзуҩцәа, егьырҭ ауаажәларратә еиҿкаарақәа рҟынтәи ҳколлегацәа ҳацны, ахәылбыҽха, цәыббрамза 27 рзы Ахьӡ-Аԥша Апарк аҿы иҭахаз аибашьцәа Рмемориал ҳаҭаауан.  Убас ала уи традицианы ишьақәгылеит. Абар шьҭа ҩыжәижәаба шықәса раахыс, абри аныҳәатә мшы, Аҟәа ақалақь аӷа иҟынтәи ахақәиҭтәра амш азы ҳара идырым анышәынҭрақәеи иҭахаз аибашьцәа рыхьӡи рыжәлеи згәылԥҟаау амармалташь хаҳәҟьаԥсқәеи рҿы ашәҭ шьыҵәрақәа рышьҭаҵареи шәкыла агәалашәаратә цәашьқәа раркреи рзы абрахь ҳаауеит.  Ари акциа ҭынч имҩаԥысуеит, ажәахәқәа рҳәарада, амузыка абжьы агарада.  Ара ҳҩызцәеи ҳареи ҳаиԥылоит, урҭ рыбжьара имаҷым аветеранцәа, ҭынч ҳаицәажәоит, ҳагәҭыхақәа еибаҳҳәоит, 1993 шықәсазы иҟаз ари амш ҳгәалаҳаршәоит, аибашьраҟынтә изыхнымҳәыз ҳҩызцәеи ҳауацәеи иаҳзааигәоу ауааи ҳгәалаҳаршәоит, аха аиҳарак ҿаҳҭӡом, доусы ҳхәыцрақәа ҳрылоуп», - ҳәа Аԥсныпресс акорреспондент диҿцәажәо илҳәеит Агуманитартә Программақәа Рцентр адиректор Арда Инал-Иԥа.