Жанна Мықәба: «Сара Бармышь ақыҭа салҵит, «Агәымшәаразы» амедал санашьоуп. Зҳәымсагьи змаҵурҭеи ааныжьны еибашьра ицаз аԥҳәыс, Баалоу-ԥҳа Мадина длыдукылар ҟалоит.
Аибашьра иалахәыз аҳәса зегьы, – фырхацәоуп. Сара Вианор Ашба акомандаҟаҵаҩыс дызмаз агәыԥ «Горец» салан. Гагра аҭарцәраан ачеченцәа ротриад аҿы сыҟан. Ари амш иагьгәырӷьатәуп, алахьеиқәрагьы ацуп. Анцәа иҳәааит уаҳа аибашьра ҟамло, уаҳа ашьа камҭәааит иԥшьоу ҳадгьыл аҿы».
Татиана Кочиева: «Сара жәаҩаҩык иқәыԥшӡаз хатәгәаԥхарауаа сыруаӡәкуп. Аԥсныҟа сааит Ҟарачы-Черкесстәи Ареспублика аҟынтәи сыԥшәма хаҵа сицны. Усҟан сара 16 шықәса заҵәык ракәын исхыҵуаз. Аибашьра шыҟалаз атәы схаҵа иҟынтәи машәыршәа исаҳаит, иара иакәзар, Аԥсны аибашьра шалагаз атәы ателехәаԥшрала иаҳаит. Ҳара рашьцәа ирыцхраарц азы Аԥсныҟа иааз раԥхьатәи хатәгәаԥхарауаа ҳреиуоуп.
Сара Аԥсны сынхоит 1992 шықәса раахыс, абар шьҭа 30 шықәса ҵуеит. Сыԥшәма хаҵеи ҩыџьа сабхәындацәеи срыцны шықәсык ирҭагӡаз иуадаҩыз аибашьра мҩа санысит. Схаҵа аибашьраҿы дҭахеит, сара сыԥсы еиқәхагәышьеит, нхара ҳәа Аԥсны сагьаанхеит. Ԥыҭраамҭак ашьҭахь ҿыц аҭаацәара салалеит. Иахьатәи амш азы ара ԥшьҩык ахшаара срануп, ԥшьҩык амоҭацәа сымоуп. Баша ирҳәаӡом, уахьиз акәӡам Уԥсадгьыл, уахьынхо, уахьыҿио ауп уԥсадгьыл!
Иҳаҩсыз аамҭатәи ахҭысқәа сгәаларшәо, усҟан даара иуадаҩын аха ҳасԥсқәа еиқәхеит ҳәа сҳәар сылшоит. Аԥсҭазаара ишаҳнарбо ала, ауадаҩрақәеи аԥықәсларақәеи ауаҩы даӡрыжәуеит. Аибашьра ашьҭахь сара Леон Иордени «Агәымшәаразы» амедали санашьахеит.
Леон Иорден санаршьеит аԥшыхәратә гәыԥ «Сатурн-ураган» алахәхаразы, «Агәымшәаразы» амедал – амедицина-санитартә баталион алахәхара азы.
Лали Исиани: «Сара 17 шықәса ракәын исхыҵуаз еибашьра санцоз. Сара сашьа жьҭаарамзазы еибашьра дцеит, уи инаишьҭархны сара сыбналаны еибашьра сцеит. Сашьа сызлеицәозеи сара, сҳәон? Ари сара Сыԥсадгьыл акәын ихьчатәыз, уи азы схы сеигӡомызт. Сеибашьуан аԥшыхәратә гәыԥ «Дракон» аҿы. Сгәыӷуеит, ҿыц еиҵагыло абиԥара ахаангьы аибашьра заку рбарым ҳәа. Аиааира саԥылеит Егры аӡиас ахықәан. 1997 шықәсазы исанашьахеит «Агәымшәаразы» амедал.
