Ҳара аекстремизми атерроризми рҿагылара иадҳәаланы имаҷымкәа аҿырԥштәқәа ҳамоуп. Еиҳа иааигәаны иҟаз аҿырԥштәқәа иреиуоуп 2014 шықәсазы Шәача ақалақь аҿы Аолимпиатә хәмаррақәа рымҩаԥгара аҽазыҟаҵарақәа раан иҟаз ахҭысқәа. Усҟан урыстәылатәи азинхьчаратә усбарҭақәеи аԥснытәи азинхьчаратә усбарҭақәеи еилахәны имҩаԥыргаз ауснагӡатә иалҵшәаны Аолимпиада аплошьадкақәа рҿы атерактқәа рымҩаԥгаразы агәҭакқәа змаз атеррористтә еиҿкаара ду аарԥшын.  

Уи  иалаз ауаа ашьаустә ҭакԥхықәра иақәыршәан, хыԥхьаӡара рацәала абџьари аџьаԥҳани рымхын. Иарбоу ахырхарҭала ҳара ҳҿы иааиԥмырҟьаӡакәа аусура мҩаԥысуеит.

Сара иахьа Аԥсны иахьаҵанакуа атеррористтә еиҿкаара ҳәа акгьы ыҟаӡам ҳәа исҳәар сылшоит», - ҳәа иазгәеиҭеит аинрал-маиор Роберт Киут.

Роберт Киут иара убас ас еиԥш аконференциақәа рымҩаԥгара иаҵоу аҵакы ахадара азгәеиҭеит.

«Ари аконференциа егьырҭ атәыла-алахәылацәа Урыстәылатәи Афедерациа ацхыраарала атерроризми аекстремизми рҿагылараҿы ирымоу рԥышәа рымадаразы зеиӷьаҟам плошьадкоуп», - ҳәа иазгәеиҭеит Аԥсны аҩныҵҟатәи аусқәа рминистр.

Аконференциа цәыббрамза  26 – 27 рзы Москва ақалақь, Урыстәылатәи Афедерациа аҩныҵҟатәи аусқәа  Рминистрра аҿы  имҩаԥысуеит.