«Иахьа, абри аҟара ашықәсқәа анҵы ашьҭахь ҳара иаҳгәалаҳаршәоит Аиааира агара заҟаҩы рыԥсы ахҭнырҵаз. Ҳара зегьы иаҳгәалашәоит ҳажәлар заҟа гәаҟра рхыргаз. Аха иуадаҩӡаз аамҭазы ргәы еиҭамԥеит ҳҵеицәа гәымшәақәа. Иагьа аамҭа царгьы, зыԥсадгьыли зыуаажәлари рыхьчаразы зхы ақәызҵаз ҳҵеи иашақәеи хатәгәаԥхарала урҭ ирывагыланы еибашьуаз ҳашьцәеи ргәалашәара наунагӡа ҳгәаҵаҿы иаанхоит. Урҭ рфырхаҵара шьаҭанкыла ҳаԥсҭазаара аԥсахит, ҳара ҭакԥхықәраны иҳадуп Ҳаԥсадгьыл ахьчара, ҳашьцәа рыԥсҭазаара ақәҵаны иаҳзааргаз ахақәиҭреи ахьыԥшымреи ҳаҭыр ақәҵара ҳуалԥшьоуп. Аибашьра еилгеижьҭеи шьҭа 30-шықәса ҵуеит ҳәа ҳҳәоит ҳара. Аха аибашьра анеилго убасҟан ауп, аҵыхәтәантәи асолдаҭ ишахәҭоу ала анышә данамадахо ашьҭахь», – ҳәа иҳәеит Давид Бжьаниа.

Арсен Ефендиев иԥа Заур Ефендиев аԥсуа жәлар иҭабуп ҳәа раҳәо хабарда ибжьаӡыз аибашьцәа зегьы рыԥшаара алыршахарц азы азеиӷьашьара ҟаиҵеит.

«Иахьа алахьеиқәҵара амш адагьы ҳагәқәа рырҭынчра иамшны иҟоуп. Аԥсны аринахысгьы ишәҭыкакаҷуа, аизҳазыӷьара аиуо иҟалааит. Ҳатрагедиа згәаҟынӡа иназгаз зегьы иҭабуп ҳәа расҳәарц сҭахуп», –  ҳәа иҳәеит иара.

Леонид Пкьын иҭынха Леонти Абӷаџь еизаз зегьы аҭаацәа рытрагедиа ахьрыцеиҩыршаз азы иҭабуп ҳәа реиҳәеит. Иара Леонид Пкьын иҭоурых еиҭеиҳәеит.

Анаҩс автоматла аицҭырҟьаратә хысра ашьҭахь, аҳәынҭқарратә бираҟқәа рыла ихҩаз аҭоубыҭқәа зҭаз аибашьцәа рыԥсыбаҩ анышә иамардеит.