Уи иажәақәа рыла, 2023 шықәсазы ахирургиатә хәышәтәра роуит 214-ҩык, 518-ҩык апациентцәа ахимиатерапиатә хәышәтәра иахысит.

Актәии аҩбатәи ацәаҳәа иаҵанакуа ахимиатә маҭәашьарқәа зегьы рыла аиқәыршәара агәабзиарахьчара Аминистрра  ахахьы иагоит.

Едуард Быҭәба, ареспублика аҿы аонкологиатә маҵзура арӷәӷәара инамҩатәны, агәабзиарахьчара Аминистрра «Ихымԥадатәиу амедицинатә бгаԥса Аполис» ҳәа апрограмма аҳәаақәа ирҭагӡаны атәыла ауааԥсыра ахәышәтәразы Урыстәылаҟа рдәықәҵара еиҿнакаауеит, уи ареспублика абиуџьет ақәыӷәӷәара акыр еиҵанатәуеит ҳәа иазгәеиҭеит.  

«Сынтәа 27-ҩык Шәача ақалақь акьыбачымазаратә Центр аҿы ахимиатерапиатә хәышәтәра иахысит, 34-ҩык – ашәахәатә терапиа иахысит. Бжьаратәла, курск ахәԥса 500 – 700 нызықь мааҭ рҟынӡа инаӡоит, имаҷӡам  зыхәԥса  1 млн. мааҭ иреиҳаны атерапиа иахрыжьуагьы.  Иарбоу ахырхарҭала аусура хымԥада иацҵахоит. Атәыла анапхгара таргетнаиа  терапиа ҳәа изышьҭоу икылкаау ахимиотерапиа азы аҭыԥантәи акьыбачымазаратә Центр афинансыркра амҽхак еиҳа-еиҳа иарҭбаауеит.  Иаагозар, иҳаҩсыз ашықәс азы 20 млн. мааҭ ҳалацәажәозҭгьы, сынтәа иалаҳҵаз азыҳәамҭақәа рыла ҳтәыла анапхгарала иазоужьхеит  40 млн. мааҭ», - ҳәа иазгәеиҭеит иара.

«Ҳара ареспублика анапхгара аганахьала аилкаара ҳамоуп, атәылауаа рыхәышәтәра – аҳәынҭқарра азы хадара злоу усуратә хырхар-аны иҟоуп. Ашықәс анҵәамҭазы акьыбачымазаратә Центр азы иаараны иҟоуп зыхәԥса ҳараку ахирургиатә еиқәыршәага, уи аахәаны адәықәҵаразы ирхиоуп», - ҳәа инаҵшьны иазгәеиҭеит атәыла агәабзиарахьчара аминистр Едуард Быҭәба.