Аҟәа. Цәыббрамза 13, 2023 шықәса. Аԥсныпресс. Аԥсны аикидо Афедерациеи Урыстәыла аикидо Амилаҭтә хеилаки аусеицуразы Аиқәшаҳаҭра рнапы аҵарҩит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.
Аиқәшаҳаҭра, аԥышәеимдареи аинформациатә еимадареи рзы аконсультациақәеи аиԥыларақәеи рымҩаԥгарала аҩганктәи аусеицура арӷәӷәареи аҿиареи рзы иарбоу аиҿкаарақәа аикидо аусхкы аҿы аусеицура азԥхьагәанаҭоит.
Аганқәа аԥснытәии урыстәылатәи аспортсменцәа, акомандақәа, азыҟаҵаҩцәа аҩ-ҳәынҭқаррак рҿы имҩаԥгахо аиндаҭларақәеи жәларбжьаратәи аспорттә усмҩаԥгатәқәеи рылахәхара иацхраалоит, иара убас аҵара-зыҟаҵаратә еизгарақәа, аикидо азы амилаҭтә еизгоуи аклубтәи акомандақәа рыспорттә ҟазара аҩаӡара ашьҭыхразы аҽазыҟаҵарақәа реицымҩаԥгареи адгылара аҭара алдыршалоит.
