Аҟәа. Цәыббрамза 13, 2023 шықәса. Аԥсныпресс. Атуризм Аминистрра аусзуҩцәа 2021шықәса инаркны атәыла аҩныҵҟатәи аусқәа Рминистрра, Аекономикатә цәгьоурақәа рҿагылара Аҟәша, Аԥсны аҳәынҭинспекциа, Аԥсны аекскурсиамҩаԥгаҩцәа Рассоциациа алархәны изакәанымкәа аекскурсиақәа мҩаԥызго раарԥшразы анҭыҵтәи ареидтә гәаҭаратә усмҩаԥгатәқәа мҩаԥыргоит.
Аԥсны 500 инарзынаԥшуа алицензиа змоу аекскурсиамҩаԥгаҩцәа ыҟоуп. Урҭ атуризм Аминистрраҿы аҽазыҟаҵаратә курсқәа мҩаԥыргоит, аамҭа-аамҭала рзанааҭдырра аҩаӡара ашьҭыхразы акурсқәа ирхысуеит. Аха иҟоуп изакәанымкәа аус зуогьы. Урҭ аофициалтә усура иаԥырхагоуп, Аԥсны аҭоурых еицаркуеит.
Ареидтә усмҩаԥгатәқәа ареспубликатә трасса иахьаҵанакуа зехьынџьара есымчыбжь имҩаԥыргоит.
Цәыббрамза 13 азы Гагра араион аҿы ареидтә усмҩаԥгатә мҩаԥысит. Ареидтә усмҩаԥгатәқәа ирылҵшәаны азинеилагаҩцәа аарԥшӡамызт.
Атуризм аминистр ихаҭыԥуаҩ Асҭамыр Барцыц ари хра злоу лҵшәоуп ҳәа иазгәеиҭеит.
«Аԥсны атуризм Аминистрра инеиԥынкыланы ареспублика иахьаҵанакуа аекскурсиатә усура аԥҟарақәа рықәныҟәара азы анҭыҵтәи агәаҭаратә усмҩаԥгатәқәа мҩаԥнагоит. Иахьа ҳара Гагра араион Холоднаиа речка иахьаҵанакуа апрофильтә хылаԥшырҭақәа алархәны ареидтә усмҩаԥгатә мҩаԥаагоит», - ҳәа иҳәеит Асҭамыр Барцыц.
Иара иарбоу аусхкы аҿы азинеилагарақәа ртенденциа лаҟәеит ҳәа инаҵшьны иазгәеиҭеит.
Иахьазы изакәанымкәа аус зуа аекскурсиамҩаԥгаҩцәа рзы 36 ԥкаанҵа еиқәыршәоуп.
