Урыстәылатәи Афедерациа атәылахьчара Аминистрра абылтәы ахархәараазы аҭаххрақәа реизҳара, урыстәылатәи анефтусдуларатә зауад дуқәа асезонтә усурақәа рзы раркра ашьҭахь, иара убас ҭагалантәи аҽаҩра аҭагалара аамҭахәҭеи Аладатәи Урыстәыла иҟоу алогистикатә проблемақәагьы уахь иналаҵаны, аҭирахьы ицәыргахо абылтәы амҽхак акыр иагхеит, убри зегьы ааизакны, Урыстәылатәи Афедерациа арегионқәеи аграртә усхкы аҿы аус зуа зегьи иаалырҟьаны абылтәы ахәԥса ашьҭыҵреи уи азымхареи иақәшәеит. Иҟоу адифицит иахҟьаны, иҳаҩсыз ашықәс иаҿырԥшны уахәаԥшуазар, аихамҩала абылтәы аагара аамҭа ҩынтә иазҳаит. Убас ала, Москватәи абылтәытә Ассоциациа адыррақәа рыла, Москва ақалақь аҿы аус зуа абылтәыҭаҭәарҭатә станциақәа рҿы адизельтә былтәы азеиԥш аизакылаҭиратә хәыԥса ҩынтә рҟынӡа иазҳахьеит.
Иара убри аамҭазы, абылтәы АИ-95 Санкт-Петербургтәи жәларбжьаратәи атауар-аӡатә биржа аҿы ахәԥса аҭоурыхтә рекордқәа шьақәнаргылоит.
«Урыстәылатәи абылтәы џьармыкьақәа рҿы ишьақәгылаз адефицит инамаданы, Урыстәылатәи Афедерациа аҟынтәи ҳколлегацәа рыҿцәжәарақәа реихшьаалақәа рыла, Аԥсны аҵыхәтәантәи аамҭазы ишьақәгылаз аҭагылазаашьа уадаҩуп, аха даара ицәгьангьы иаабом. Ахылаԥшырҭа иамоу адыррақәа рыла абылтәы аагарақәа ирыдҳәалоу аҭагылазаашьа ацклаԥшразы алшара аԥнаҵоит. Аминистрра аҿы зыԥшра ҟамҵакәа иӡбатәу азҵаара – адефициат ашьақәгылара алмыршара азы ирылшо зегьы ҟарҵоит», - ҳәа иазгәаҭоуп Аминистрра аҳәамҭа аҿы.
Цәыббрамза 12 азы аекономика Аминистрра иҟанаҵо адыррақәа рыла, Аԥсны анефтьҵәахырҭақәа рҿы иҟоу анефтаалыҵқәа рымҽхак 2 624 тонна адизельтә былтәи 3510 тонна абылтәи рыла ишьақәгылоуп.
Атәыла аекономика Аминистрра иара убас иҟанаҵо адыррақәа рыла, 3067 тонна абылтәы (Аԥсны абылтәытә џьармыкьа алахәылацәа рҟынтәи еидкылоу рдыррақәа) ахә шәоуп, идәықәҵоуп, амҩа иқәуп.
