Аҟәа. Цәыббрамза 11, 2023 шықәса. Аԥсныпресс. Цәыббрамза 3 инаркны 10-нӡа Аԥсны, ареспублика акультура Аминистрра адгыларала имҩаԥысуан «Аурыс культура Амшқәа». Алитераторцәа, ажурналистцәа, асахьаҭыхыҩцәа зеилазаараҿы иҟоу Урыстәылантәи аделегациа напхгара алҭон аҭоурыхҭҵааратә наукақәа рдоктор, академик, алитературадырҩы, ажурнал «Литературные знакомства» (ақ.Москва) аԥҵаҩы, аредактор хада Лола Звонарева. Аурыс культура Амшқәа ацеиҿкааҩы иаҳасабала дцәырҵит ашәҟәыҩҩы, Евразиа ажәларқәа Рассамблеиа Алитературатә хеилак ацхантәаҩы, Фазиль Абдул-иԥа Искандер ихьӡ зху апремиа алауреат, аурыс ПЕН-центр алхәыла Владимир Делба.
Иара иоуп иара убас цәыббрамза 7 рзы Аԥсны Амилаҭтә библиотека аҿы имҩаԥысыз ажурнал «Литературные знакомства» изаамҭанытәиу аномер аӡыргара иазку ацеремониа аҿы амҩаԥгаҩыс иҟазгьы. Ари ажурнал аҿы имаҷымкәа аҭыԥ азалхуп ус иазуҳәар ҟалозар, ажурнал аҿы ашәҟәы «Аԥсуа литературатә тетрад». Ари арубрика ажурнал аҿы аартра шықәсқәак раԥхьа иаԥшьылгеит Лола Звонарева.
Ас еиԥш иҟоу аизгамҭақәа ирыбзоураны урыстәылазегьтәии аҳәаанырцәтәии аԥхьаҩ еиуеиԥшым атәылақәеи Урыстәылатәи Афедерациа арегионқәеи ареспубликақәеи рҟынтәи хыԥхьаӡара рацәала алитераторцәа рырҿиамҭақәа аамҭакала ибартә алшара изаԥҵахоит. Апрезентациа амҩаԥгаҩ Владимир Делба иара убас «Аԥсуа литературатә тетрад» аиқәыршәаҩыс дыҟан.
Иара аиҳарак дахьынхо ақалақь Москва дыҟанаҵ, Владимир Делба ҭалла еицырдыруаз реиԥш, ҿыц аҿиарамҩа ианылозгьы еиуеиԥшым Аԥснытәи атитераторцәа рыҽрымидон, дара ракәзар, еиуеиԥшым ашықәсқәа рзы иаԥырҵахьаз, еиҳа ргәы ззыбылуаз рырҿиамҭақәа алхын рхала аелектронтә пошьҭала изаарышьҭуан. Аха урҭ зегьы хыԥхьаӡарала акьыԥхьразы иазԥхьагәаҭоу аасҭа акыр еиҳахеит ажурнал аредколлегиа ирыдгалоу аматериал еиҳа «алитературатә тетрад» алалара зыхәҭоу ҳәа алкааразы. Урҭ алфавитла еиқәыршәаны ишьақәдыргылеит.
Аиҳарак, урҭ аԥсуа бызшәахьынтә аурысшәахь еиҭагаз Вахтанг Абҳазоуи Геннади Аламиеи, Владимир Занҭариеи Валери Касланӡиеи, Гәында Кәыҵниеи Анатоли Лагәлааи, Мушьни Лашәриеи Гәында Сақаниеи Заира Ҭҳаиҵыҟәи, уҳәа убас аӡәырҩы....
Иара убас, ажурнал иалалеит иара автор ихаҭам Даур Наҷҟьебиа ила аԥсуа бызшәахьынтә аурысшәахь еиҭагоу ажәабжь, ауыс бызшәала иҩу Денис Чачхалиа ипрозеи иажәеирлаарақәеи, зажәеинраалақәа урыс бызшәала изыҩуа аԥсуа авторцәа - Леила Ԥачлиа лажәеинраала, Владимир Делба ипроза, Руслан Ҭарба, аишьцәа Ибрагими Ричарди Ҷкадуаа, Витали Шариа. Аизга иалалеит иара убас аурыс литераторцәа рырҿиамҭқәа – Надежда Венедиктова лажәеинраалақәа, Лилиана Иаковлева лыпроза, Артавазд Сарециан ипрозеии Георги Зильфов иажәеинраалақәеи.
Витали Шариа.
