13-шықәса зхымҵыц аспортсменцәа рыбжьара аиааира ргеит Сабри Нанба (ақ. Аҟәа), Миланиа Гәымба (ақ. Пицунда), аҩбатәи аҭыԥқәа ааныркылеит Алеқсандр Ешба (ақ.Пицунда), Даниела Гәымба (ақ. Аҟәа), ахԥатәи аҭыԥқәа ааныркылеит Лионель Қриа (ақ. Аҟәа), Алиа Ҵнариа (ақ. Аҟәа).
17шықәса зхымҵыц аспортсменцәа рыбжьара актәи аҭыԥқәа ааныркылеит Сабри Нанба (ақ. Аҟәа), Ева Беденашвили (ақ. Аҟәа), араӡны медалқәа роуит Григори Табариан (ақ. Аҟәа), Валериа Џьынџьал (ақ. Аҟәа), ахԥатәи аҭыԥқәа ааныркылеит Алеқсандр Ешба (ақ.Пицунда), Даниела Гәымба (ақ. Аҟәа).
Аиҳабацәа рыбжьара актәи аҭыԥ ааникылеит Саид Бебиа (ақ.Гәдоуҭа), аҩбатәи аҭыԥ ааникылеит Ҭемыр Лашәриа (ақ. Аҟәа), ахԥатәи аҭыԥ - Сабри Нанба (ақ. Аҟәа).
Аҳамҭақәа ранашьара ацеремониа рхы аладырхәит аҿари аспорти русқәа рзы аҳәынҭқарратә Еилакы ахантәаҩы Ҭарашь Ҳагба, аҳәынҭқарратә Еилакы анапхгаҩы Жанна Занҭариа, Адунеизегьтәи аԥсуа-база жәлар Рконгресс Иреиҳаӡоу Ахеилак алахәыла Беслан Кобахьиа, Ареспублика Аԥсны аԥкьаҭмпыл Афедерациа апрезидент Ҭамаз Абӷаџьаа, Арзамеҭ Ҭарба ихьӡ зху Ареспубликатә ԥкьаҭмпылтә школ адиректор, аԥкьаҭмпыл азы Аԥсны аспорт азҟаза Елизабет Акәыциа, Аԥсны аерманцәа реилазаара ахантәаҩы Артур Чакриан, атурнир аӡбаҩ хада, ареспубликатә категориа змоу аӡбаҩ Саид Бебиа.
Аԥхьахә «Аиааиразы агәазыҳәара» ланашьахеит Софиа Чаабал. Аиааира згази аԥхьахәгаҩцәеи Аԥсны аерманцәа Реилазаара, Аҟәатәи ақалақьтә Еизара ахантәаҩы Дмитри Осиа, аҿари аспорти русқәа рзы аҳәынҭқарратә Еилакы рыхьӡала аҳамҭақәа ранашьахеит.
Саид Бебиа, ахәыҷқәа рыхәмаршьа аҩаӡара шьҭыҵит, урҭ даара ибзианы иқәгылеит ҳәа иазгәеиҭеит.
Азыҟаҵаҩ Елизабеҭ Акәыциа лааӡамҭацәа аԥхьахәтә ҭыԥқәа ааба ааныркылеит.
«Сара азыҟаҵаҩ иаҳасабала еиӷьу алҵшәа сашыԥсызаргьы, сааӡамҭацәа қәҿиарала иқәгылеит ҳәа сҳәар алшоит. Даара сақәгәыӷуеит иааиуа атургир аҿы урҭ еиҳа аеффективра аланы, еиӷьу алҵшәақәа рыманы ишықәгылауа. Атурнирқәа зегьы агхақәа иҟоу унарбоит, убас ала анаҩс аус зыдуалатәу аганқәа аабоит», - ҳәа иазгәалҭеит Елизабеҭ Акәыциа.
Атурнир аиҿкааҩцәа – Аԥсны аҿари аспорти русқәа рзы аҳәынҭқарратә Еилаки Аԥсны аԥкьаҭмпыл Афедерациеи.
