Акруиз 6-мыш имҩаԥыслоит. Раԥхьатәи аанкылара – Роза Хутор, адырҩаҽны атуристцәа Гаграҟа инаӡоит. Ахԥатәи амш Афон Ҿыцҟа ацара иазкхоит, даҽа ҩымш атуристцәа Аҟәа ақалақь аҿы ирхыргоит. Акруиз аҵыхәтәантәи амш Шәача имҩаԥысуеит.
Ареспубликатә Унитартә Наплакы Аԥснытәи Аихамҩа атәылаҿы еиҳа атуристтә дәыӷбақәа ныҟәаларц азы аринахысгьы Урыстәылатәи Афедерациа Афедералтә пассаџьыртә еилазаара аус ацура азы иманшәалоу аҭагылазаашьақәа раԥҵара иазхиоуп. Иара убас иаԥҵан аиҿкаара Зҭакԥхықәра ҳәаақәҵоу Аилазаара «Аԥснытәи Аихамҩа ТУР», уи атуристтә ҟазшьа змоу ас еиԥш иҟоу апроектқәа рынагӡаразы аҭакԥхықәра нанагӡалоит.
Адәыӷба адкыларазы астанциақәа «Аҟәа», «Гагра» аҿы амчратә трансформаторқәа шьақәыргылан, иҿыцу афымцамҩангага наган. Адәыӷба агылараан авагонқәа зегьы рҟынӡа хазы афымца нагахартә еиқәыршәоуп. Иара убас адәыӷба ӡыла аиқәыршәаразы аҭагылазаашьақәа аԥҵоуп.
