Лана Абшьылаа лажәақәа рыла, уи аҿы адгылара лынаҭеит амобилтә еимадара аоператор «А-Мобаил».

«Анаҩс апроект ацавтор Беслан Лагәлаа икомандеи ҳареи аусеицура ҳалагеит. Авидео-интервиу адагьы, аветеранцәа рпортреттә фото аԥҵаразы аидеиа ҳазцәырҵит, ари аусура анагӡара ихахьы игеит Беслан Лагәлаа. Ҳара 30 шықәса ирылагӡаны аибашьраҿы ралахәхара азы аӡәгьы изеиҭазымҳәацыз аветеранцәа рхаҭа иаҳзеиҭарҳәаз аҭоурыхқәа рыла 15 инарзынаԥшуа ажәабжьтә материал ҭаҳхит», - ҳәа илҳәеит лара.

Лана Абшьылаа, аԥхьанатә Аиааира Амш 30-шықәса ахыҵра аламҭалазы 30 жәабжьтә материал аиқәыршәара азԥхьагәаҭан, аха ари агәҭакы анагӡаразы аамҭа маҷын ҳәа иазгәалҭеит.  

Апроект рхы аладырхәит Аԥсны араионқәа зегьы рҟынтәи ахаҭарнакцәа.

Лана Абшьылаа, зегьы раасҭа иуадаҩыз аветеранцәа аинтервиу аҭаразы разаагара акәын ҳәа иазгәалҭеит.

«30 шықәса зхы еиҭазымҳәоз, аибашьратә хҭысқәа рзы згәалашәарақәа ауаа ирзеиҭазымҳәоз, аибашьраан ихигаз ауадаҩрақәеи агәырҩеи ахьааи згәаҵаҿы иҭаҵәахны измаз  ауаҩы ирцәажәара акыр иуадаҩын. Сара урҭ ари ҭоурыхуп, еиҵагыло абиԥара азы акыр аҵанакуеит, избан акәзар аҿар рфырхацәа хаҭала ирдыруазар ахәҭоуп ҳәа реилыркаара сҽазысшәонан. Сара хаҭала аихьӡарак аҳасабала сахәаԥшуеит Аиааира агара анаҩс 30-шықәса анҵы ашьҭахь  15-ҩык аветеранцәа гәаартыла рыҿцәажара ахьсылшаз», - ҳәа инаҵшьны иазгәалҭеит лара.